Tribunë shkencore për Karnavalet e Bozovcës dhe Ditën e Verës

Instituti i Trashëgimisë Shpirtërore e Kulturore të Shqiptarëve – Shkup, të dielën dhe të hënën zhvilloi dy aktivitete që lidheshin me traditat e lashta të popullit tonë, përkatësisht manifestime rreth ndryshimit të stinëve të motit.

Më 13 mars 2016, në fshatin Bozovcë të Malësisë së Sharrit – Tetovës, u mbajt manifestimi tradicional “Karnavalet Ilire”, organizuar nga z.Neshat Mehmedi dhe Komuna e Tetovës, në shenjë të përfundimit të dimrit dhe fillimit të stinës së verës, në bazë të traditës së vjetër pagane ilire.

ITSHKSH ishte bashkëorganizatore e tribunës shkencore për karnevalet ilire, ku referuan disa studiues të njohur të kësaj fushe. Referatin kryesor e paraqiti studiuesi i folklorit dhe etnokulturës shqiptare, Prof.dr.Izaim Murtezani, kurse me kumtesë nga ITSHKSH u prezantua studiuesi Rini Useini.

Më 14 mars, në Strugë u zhvilluan disa aktivitete që lidheshin me Ditën e Verës. ITSHKSH në bashkëpunim me Komunën e Strugës dhe Shoqatën “Liqeri”, organizuan tribunën shkencore me temë “Dita e Verës – vlerë e trashëgimisë kulturore të shqiptarëve”.

Drejtori i ITSHKSH-së, Dr. Skender Asani, tha se vlerat tona të lashta kulturore e shpirtërore, duhet kultivuar, meqë ato janë pjesë e traditës dhe të së kaluarës sonë, janë pjesë e identitetit tonë. “Dita e Verës është manifestuar kaherë në mesin e shqiptarëve të këtyre trevave, për të shënuar mbarimin e stinës së dimrit, dhe fillimin e stinës së verës, atëherë kur në popull njiheshin dy stinët kryesore – vera dhe dimri”, tha Asani, duke shtuar se komunat shqiptare janë partnerë strategjik të Institutit tonë për realizimin e projekteve me rëndësi.

Kryetari i Komunës së Strugës, Ziadin Sela, tha se komuna që ai e drejton, është e hapur për organizime të tilla të përbashkëta, që janë në funksion të ruajtjes së vlerave tona të lashta kulturore e kombëtare.

Gjatë tribunës shkencore që u zhvillua në hapësirën e Komunës së Strugës, u lexuan këto kumtesa: “Dita e Verës – konteksti historik dhe aktual” nga Prof.dr.Izaim Murtezani, “Dita e Verës- relikt kulturor në fshatin Patishka- Karshiakë” nga Prof. dr.Bukurie Mustafa, “Festimi i Ditës së Verës në fshatrat Veshalle dhe Bozovcë të Malësisë së Tetovës” nga Prof.dr.Vebi Bexheti, “Simbolika e Ditës së Verës në trevën e Kërçovës” nga Prof.dr.Hamit Xhaferi, “Dita e Verës në trevën e Pellagonisë” nga Prof.dr.Mustafa Ibrahimi, “Dita e Verës në Malësinë e Sharrit të Tetovës” nga Neshat Mehmedi, “Dita e Verës – praktika e sotme në fshatrat e Strugës” nga Mr.sc.Rini Useini, dhe “Rëndësia e Ditës së Verës për etnokulturën shqiptare” nga Afet Jashari.

Të gjitha punimet e prezantuara në këto dy konferenca shkencore, do të botohen në numrat e radhës të revistës “Scupi”. /www.itsh.edu.mk/