ITSH Instituti i Trashëgimisë Shpirtërore e Kulturore të Shqiptarëve – Shkup
Prishtinë, 17.05.2024 – Dje në Prishtinë u nënshkrua marrëveshje e bashkëpunimit në mes Institutit të Historisë “Ali Hadri” – Prishtinë dhe Institutit të Trashëgimisë Shpirtërore e Kulturore të Shqiptarëve – Shkup. Marrëveshja u nënshkrua nga drejtorët e dy institucioneve respektive shkencore, dr. Teuta Shala – Peli dhe dr. Skender Asani.
Qëllimi i kësaj marrëveshje është bashkëpunimi dhe mbështetja reciproke në fushat prioritare të dy instituteve.
Dy institutet u dakorduan për të bashkëpunuar në realizimin e projekteve të përbashkëta hulumtuese – shkencore dhe botuese, veçanërisht në tema që kanë të bëjnë me historinë e shqiptarëve të Kosovës dhe të Maqedonisë së Veriut.
Në prioritetet e bashkëpunimit në kuadër të kësaj Marrëveshje bëjnë pjesë edhe: organizimi i aktiviteteve të përbashkëta shkencore, projektet hulumtuese që prekin tema rajonale dhe ndërkombëtare, organizimi i vizitave studimore dhe vizitave në institucione shkencore, arsimore e arkivore, etj.
Në formalizimin e nënshkrimit të kësaj marrëveshjeje, morën pjesë edhe udhëheqësi i departamentit të Historisë në ITShKSh – dr. Besnik Rameti, kryetari i Këshillit – dr. Sevdail Demiri, si dhe sekretari shkencor i Institutit të Historisë në Prishtinë – dr. Fitim Rifati.
