“Karnavalet Ilire” në Bozovcë të Malësisë së Sharrit

13.3.2016 – Sot në Bozovcë të Tetovës u zhvillua manifestimi tradicional “Karnavalet Ilire”, në shenjë të përfundimit të dimrit dhe fillimit të stinës së verës, në bazë të traditës së vjetër pagane ilire.

Para të pranishmive parakaluan dhjetëra banorë të malësisës me maska dhe veshje karakteristike, si dhe u dha një program artistik. Të pranishmi u përshëndetën nga organizatori Neshat Mehmeti, përfaqësuesi i Komunës së Tetovës, Ahmet Qazimi, drejtori i ITSHKSH-së, Skender Asani, studiuesit Vebi Bexheti, Fatmir Sulejmani, aktori Agron Biba, etj.

Me këtë rast, në bashkëorganizim të ITSHKSH-së, u zhvillua një tribunë shkencore, ku u lexuan disa kumtesa nga studiues të kësaj lëmie nga Maqedonia, Kosova e Shqipëria, ku referatin kryesor e paraqiti studiuesi i folklorit dhe etnokulturës shqiptare, Izaim Murtezani. Të gjitha punimet do të botohen në një nga numrat e radhës të revistës “Scupi”. /www.itsh.edu.mk/