Me rastin e shënimeve të Festës së Alfabetit, 75 vjetorit të shkollave të para shqipe dhe përvjetorit të nëntë të Institutit të Trashëgimisë Shpirtërore dhe Kulturore të Shqiptarëve (ITSHKSH) në Shkup, do të organizohen një sërë aktivitetesh kulturore dhe shkencore.

Kështu, më 18 nëntor 2016, ITSHKSH dhe Posta e Maqedonisë do të promovojnë pullën e re postale me imazhe që reflektojnë gjendjen e shqiptarëve në Maqedoni me rastin e 75 vjetorit të hapjes së shkollave të para shqipe.

Më 20 nëntor 2016, tri qendrat albanologjike shqiptare: ITSHKSH-Shkup, Instituti Albanologjik i Prishtinës dhe Qendra e Studimeve Albanologjike e Tiranës, në Shkup organizojnë konferencë shkencore me temë: “75-vjetori i hapjes së shkollave shqipe në Kosovë dhe në Maqedoninë Perëndimore”. Përveç shumë studiuesve dhe akademikëve të njohur që do të paraqiten me kumtesa shkencore, në hapje të konferencës do të prezantojnë edhe ministrat e Arsimit nga tri shtetet tona: Maqedoni (Pishtar Lutfiu), Kosovë (Arsim Bajrami) dhe Shqipëri (Lindita Nikolla).

Më 21 nëntor 2016, ITSHKSH-Shkup në bashkëpunim me Institutin për Studime Shqiptare dhe Protestante në Tiranë, do të promovojnë tri libra interesante nga protagonistët kryesorë të Kongresit të Manastirit, si “Jetëshkrimi i Sevasti Qiriazi-Dakos”, “Biografia e Gjerasim Qiriazit”-Xhon Kuanrud, dhe “Pengu i kaçakëve”-Gjerasim Qiriazi. Një pjesë e këtyre librave do t’u dhurohen bibliotekave të shkollave të mesme shqipe të Shkupit dhe rrethinës, si dhe institucioneve të larta arsimore e shkencore.

Kurse, më 22 nëntor 2016 do të udhëtohet për në qytetin e Manastirit, ku organizohet manifestimi qendror me rastin e 108 vjetorit të Kongresit të Alfabetit të Gjuhës Shqipe, ku do të promovohet edhe dhoma me figurat delegatëve të Kongresit.