“Flaka e Vëllazërimit”, abetare e dytë për shqiptarët

Shkup, 4 prill 2015 – Instituti i Trashëgimisë Shpirtërore e Kulturore të Shqiptarëve (ITSHKSH)- Shkup, në bashkëpunim me Shoqatën e Gazetarëve të Maqedonisë (SHGM) dhe Shoqatën e Historianëve Shqiptarë të Maqedonisë (SHHSHM), sot shënoi 70 vjetorin e botimit të numrit të parë të gazetës shqipe “Flaka e Vëllazërimit”.

Me këtë rast, në ambientin e Institutit, u hap ekspozita me disa fotografi – imazhe të gazetës Flaka ndër vite, ku edhe u zhvillua një debat i ngjeshur lidhur me kontributin e kësaj gazete.

Sefer Tahiri nga Këshilli organizativ, tha se para një muaji është bërë ftesë publike për të gjithë të interesuarit për të marrë pjesë aktive në këto aktivitete,

dhe se një pjesë e protagonistëve kryesorë të gazetës “Flaka”, iu kanë përgjigjur thirrjes.

Skender Asani, drejtor i ITSHKSH, tha se gazeta “Flaka” është kontinuitet i zhvillimit të shtypit shqiptar në këto troje, që nga “Bashkimi i kombit” në Manastir e “Shkupi” në Shkup, dhe si e tillë ka zënë një vend të merituar në historinë e shtypit. “Gazeta “Flaka” gazetë është trashëgimi kulturore e historike e shqiptarëve të këtyre trojeve, dhe si e tillë meriton vëmendje dhe kujdes më të madh institucional”, u shpreh Asani.

Naser Selmani, kryetar i SHGM, tha se pushteti komunist gazetën e themeloi për qëlime ideologjike, por megjithatë nuk duhet të mohohet roli pozitiv që ka luajtur gazeta në informimin në gjuhën shqipe. “Ndër vite, qindra gazetarë, në mesin e tyre edhe emra të shquar të letrave shqipe, me shumë guxim dhe përkushtim profesional, kanë trajtuar çështje jetike për lexuesin shqiptar”, tha Selmani, sipas të cilit është dëm i madh që sot kjo gazetë nuk funksionon më, si pasojë e papërgjegjësisë së shtresave politike dhe publike tek ne.

Në vazhdim, një referat historik për 70 vjetorin e botimit të numrit të parë të gazetës “Flaka e Vëllazërimit”, në emër të Këshillit organizativ e paraqiti Sevdail Demiri, i cili tha se në vend se ky përvjetor i 70-të të shënohej me akademi solemne dhe me një format më festiv nga vetë udhëheqja e gazetës, sot po shënohet në mënyrë modeste – përkujtimore nga Instituti dhe dy shoqata respektive. “Derisa simotrat e saj, sot vazhdojnë të jenë ndër gazetat më të lexuara dhe të respektuara në vend, “Flaka” po bën gati se një dekadë që ka kaluar në histori. Por, pavarësisht nga kjo, dhe pavarësisht nga zërat që edhe sot e kësaj dite vazhdojnë të hedhin gurë e dru për këtë gazetë dhe të kaluarën e saj, ne megjithatë kemi vendosur që sot ta shënojmë këtë përvjetor. E bëmë këtë duke u nisur nga arsye thellësisht parimore dhe profesionale, duke mos i parë gjërat bardh e zi, por me gjithë mozaikun e tyre në kontestin e caktuar kohor. Pra, e bëmë këtë për të vlerësuar punën e një institucioni mediatik, i cili edhe pse në kohë dhe rrethana të caktuara politike, shumë të rënda për shqiptarët, luajti rol të madh në procesin e arsimimit dhe kulturimit të shqiptarëve të Maqedonisë dhe më gjerë.

Ndërsa, Naser Selmani, në emër të Shoqatës së Gazetarëve të Maqedonisë, i dorëzoi Mirënjohje post mortum Petro Janurës – kryeredaktorit të parë të gazetës, të cilën Mirënjohje e pranoi i nipi i tij, avokati Petro Janura.

Më pas, në debat aktivisht morën pjesë ish-kryeredaktorët e gazetës, Fejzi Bojku, Abdylhadi Zylfiqari, Faik Mustafa, Zeqirja Rexhepi, Daut Dauti, ish-redaktorët e gazetarët Halil Zendeli, Shkëlzen Halimi, Nazif Zejnullahu, Mixhait Pollozhani, Tahir Zajazi, Xheladin Murati, Mustafa Peza, Enver Shala, Abdurrahman Kurtishi, studiuesi Blerton Sulejmani, etj. Të gjithë këta folën për aspekte të ndryshme të kësaj gazete ndër vite, dhe sidomos duke vënë theksin në humbjen e këtij brendi të rëndësishëm, me të cilin u rritën gjenerata të tëra.

Gazeta “Flaka e Vëllazërimit” dhe revistat e saj “Fatosi” dhe “Gëzimi”, u vlerësuan si trashëgimi kulturore e historike të shqiptarëve të Maqedonisë. Një nga konkluzat e debatit ishte, që të shqyrtohet seriozisht mundësia e ruajtjes së asaj që ka mbetur pa u zhdukur deri tani. Një punë shumë e rëndësishme dhe e mundur të realizohet, është digjitalizimi i plotë i gazetës, për ta parandaluar shkatërrimin e plotë të arkivit të saj që në gjendje jo shumë të mirë, gjendet në Bibliotekën Kombëtare dhe Universitare të Shkupit. Ky projekt kërkon mbështetje serioze nga institucionet shtetërore, e në radhë të parë nga Ministria e Kulturës.

Çështja e rikthimit në jetë të emrit të “Flakës”, gjithashtu ishte një impenjim serioz, që kërkon njerëz të fortë dhe të vendosur për të ruajtur vlerat tona.