Punonjësit e ITSHKSH-së, për vizitë në Turqi

Një vizitë mbresëlënëse ishte edhe takimi në Arkivin Shtetëror Osman të Stambollit, ku u pritën nga drejtori Оnder Bajir. Ky është një ndër arkivat më të pasura në botë, me mbi 100 milionë dokumente nga të gjitha periudhat historike dhe me një trend marramendës të digjitalizimit

Shkup – Prej 20 deri më 26 maj 2012, punonjësit e Institutit të Trashëgimisë Shpirtërore e Kulturore të Shqiptarëve në Maqedoni (ITSHKSHM), nën udhëheqjen e drejtorit Shefqet Zekolli, qëndruan në Republikën e Turqisë, ku vizituan institucione të rëndësishme shkencore e kulturore në Stamboll dhe Bursë.

Në një informatë të lëshuar nga ky institut, thuhet se vizita e parë ishte në Fondacionin për Art dhe Shkencë (BISAV) në Stamboll, të themeluar nga Ahmet Davutogllu, Mustafa Ozel dhe Murat Ylker. Biblioteka e këtij instituti numëronte afër 80.000 libra, ndërsa studentët, që aty studionin thjesht për të fituar dije dhe nuk merrnin asnjë diplomë, ishin mbi 3000 nga vende të ndryshme të botës. Ky fondacion, dy vjet më parë ka themeluar edhe njërin ndër pesë universitetet më cilësore në Turqi, Sehir University. Aty ne u pritëm nga Mustafa Ozel, i cili shprehu gatishmërinë për të hapur dyert e BISAV-it dhe të universitetit Sehir edhe për studiuesit tanë.

Një vizitë mbresëlënëse ishte edhe takimi në Arkivin Shtetëror Osman të Stambollit, ku studiuesit shqiptarë u pritën nga drejtori Оnder Bajir. Ky është një ndër arkivat më të pasura në botë, me mbi 100 milionë dokumente nga të gjitha periudhat historike dhe me një trend marramendës të digjitalizimit.

Në institutin e Qendrës së Konferencës Islamike – IRSICA, të vendosur në pallatin e Sulltan Abdulhamidit II, ne, punonjësit e ITSHKSH-së, u takuan me drejtorin, dr. Halit Eren. Sipas tij, kjo qendër është një lloj UNESCO e shteteve myslimane dhe ajo merret me organizimin e konferencave shkencore dhe seminareve të shumta. “Interesi i turqve në Maqedoni kalon nëpërmjet miqësisë me shqiptarët, kurse interesi i shqiptarëve në Ballkan kalon nëpërmjet Turqisë”, do të shprehet veç tjerash Eren, që është njëri nga njerëzit më me ndikim në botën shkencore Turqi dhe në përgjithësi në botën myslimane.

Në kuadër të kësaj vizite ishte edhe takimi në Fondacionin RUTEV, të përbërë nga 12 shoqata joqeveritare, mes tyre edhe një shoqatë shqiptare-turke. Aty na priti kryetari i RUTEV-it, z. Hasan Imamoglu  me prejardhje nga Kamjani i Tetovës. Këtu e takuаn edhe themeluesin e këtij fondacioni, shkupjanin Melek Aras, i cili natën e ardhshme u rezervoi një pritje të ngrohtë në objektin e vjetër 1600 vjeç “Sulltan Sarniç”.

Në kuadër të kësaj vizite e vizituam edhe Institutin e Studimeve Islame në Turqi – ISAM, që është më i madhi i këtij lloji, me afër 225.000 libra dhe me qasje në afërsisht 120 biblioteka turke përmes databazës së internetit. Ky institut ka botuar 44 vëllime të Enciklopedisë Islame në turqisht, e cila tashmë merret si referencë kryesore në gjithë botën shkencore. Nga ky institut ka dalë edhe Universiteti “29 Maj” i Stambollit, prej ku dalin kuadrot më të mira në histori, letërsi dhe teologji..

Në Stamboll po ashtu e vizituan edhe xhaminë dhe bibliotekën Sulejmanie me mbi 70.000 dorëshkrime nga 100 deri në 1300-vjeçare, xhaminë e Sulltan Ahmedit, Turqinë në Miniaturë, muzeun “Panorama 1453”, Akuariumin etj.

Vizita jonë vazhdoi në Bursë, një bashki me mbi 2 milionë e gjysmë banorë, ku takuam kryetarin Rexhep Alltepe, me origjinë nga Shkupi, si dhe ndihmësit e tij Nexhmedin Shenoxhak dhe Bajram Vardar, gjithashtu me origjinë shqiptare. Takimi ishte mbresëlënës dhe me premtime serioze për vazhdimin e bashkëpunimit të ndërsjellë, thuhet në njoftimin e institutit.

Stacioni i fundit i vizitës në Turqi ishte qyteti i Çanakalasë, ku është zhvilluar një nga betejat më të përgjakshme të Luftës së Parë Botërore dhe ku kanë mbetur të vrarë shumë shqiptarë.

Nga kjo vizitë dolën shumë ide dhe projekte të cilat synohet të realizohen në periudhën e ardhshme, kjo në saje të bashkëpunimit të vendosur me institucionet e sipërpërmendura turke.

Vizita është mundësuar nga Administrata Turke për Bashkëpunim Ndërkombëtar (TIKA) dhe komunat e ndryshme në Stamboll e Bursë.

 

……………………………………………………………………………………………………………………………………………………..