U nënshkrua Memorandumi i bashkëpunimit mes ITSHKSH-së dhe IHN-së

Shkup, 05.03.2013 – Instituti i Trashëgimisë Shpirtërore e Kulturore të Shqiptarëve të Maqedonisë, sot nënshkroi Memorandumin e bashkëpunimit me Institutit e Historisë Nacionale të Maqedonisë (IHN). Memorandumi u nënshkrua nga drejtuesit e këtyre dy institucioneve, përkatësisht Dr.Shefqet Zekolli dhe Dr.Dragi Georgiev, në prani të ambasadorit amerikan në Maqedoni, Pol Uolers dhe ambasadores gjermane Gurdun Steinacker.

Drejtori i ITSHKSH-së, Shefqet Zekolli, tha se përmes këtij memorandumi, do t’i vjemë bazat e bashkëpunimit institucional ndërmjet këtyre dy instituteve relevenate shkencore në Maqedoni. Përmes këtij bashkëpunimi, do të mundohemi t’i tejkalojmë barrierat e formave të ndryshme që na përcjellin për cdo ditë

Kurse, drejtori i IHN, Dragi Gjeorgiev, u shpreh se ideja është që përmes projekteve të përbashkëta me institutin shqiptar në fushën e historisë, dhe sidomos në ato segmente ku mund të gjenden elementet dhe shembujt nga e kaluara e përbashkët e të gjithëve që jetojnë në Republikën e Maqedonisë, të ndikohet në përmirësimin e ardhmërisë sonë të përbashkët.

Ambasadorët Uolers dhe Steinacker, thanë se ky akt i sotëm është shembull se si duhet të bashkëpunojnë shkencëtarët e bashkësive të ndryshme etnike, në shkrimin e historisë mjaft të ndjeshme të popujve të Ballkanit, por edhe për hulumtimin shkencor të trashëgimisë së tyre kulturore e historike. Ambasadori Uolers shtoi se ky është një shembull i mirë se si duhet të tejkalohen edhe tensionet etnike të ditëve të fundit në Maqedoni.

Me këtë memorandum, të dy institutet vlerësojnë që trashëgimia historike dhe kulturore, luan rol të rëndësishëm në përmirësimin e raporteve ndëretnike tek të gjitha komunitetet që jetojnë në vend. Memorandumi parasheh bashkëpunimin e ndërsjellë në projekte dhe hulumtime të përbashkëta shkencore, në shkëmbimin e kuadrove dhe literaturës profesionale shkencore, në bashkëpunimin ndërkombëtar e rajonal, etj. Të dy institutet ranë dakord që në aktivitetet e ardhshme të cilat do të jenë të ndërlidhura me historinë dhe trashëgiminë kulturore, t’i përfshijnë si partnerë edhe Shoqatën e Historianëve të Maqedonisë, Shoqatën e Historianëve Shqiptarë të Maqedonisë, dhe Asociacionin e Arsimtarëve të Historisë në Republikën e Maqedonisë.

Nënshkrimi i këtij memorandumi u ndërmjetësua nga Qendra Trajnuese për Menaxhim me Konflikte (TCMC) nga Shkupi, e drejtuar nga Albert Hani, si dhe nga Forumi gjerman ZFD që drejtohet nga Silke Maier –Vitt. /itshksh/

 ……………………………………………………………………………………………………………………………………..