ITSHKSH-në e vizitoi ambasadori bullgar Petkov

Shkup – Institutin e Trashëgimisë Shpirtërore dhe Kulturore të Shqiptarëve në Shkup e vizitoi ambasadori i Republikës së Bullgarisë në Maqedoni, Ivan Petkov, i cili i solli institutit vepra shkencore dhe artistike në gjuhën bullgare. Në takimin me drejtorin dr. Shefqet Zekolli, ambasadori Tetkov shprehu interesim për veprimtarinë e Institutit dhe u angazhua për një bashkëpunim të ndërsjellë mes Institutit të Trashëgimisë Shpirtërore dhe Kulturore të shqiptarëve me institucionet shkencore të shtetit bullgar, duke realizuar projekte të përbashkëta hulumtuese shkencore nga më shumë fusha: historia, trashëgimia kulturore, folklori, gjuha, letërsia e kështu me radhë.

Ambasadori bullgar në Shkup, Ivan Petkov premtoi se do të mundësohet realizimi i një vizite e studiuesve tanë në institucionet shkencore dhe arsimore në Bullgari, në të cilën do të vizitohen institutet hulumtuese-shkencore, arkivat historike dhe bibliotekat më të rëndësishme dhe do të këmbehen ide mbi format e bashkëpunimit të ndërsjellë.

Në takimin me drejtorin e Institutit, dr. Shefqet Zekolli, ambasadori bullgar në Shkup, Ivan Petkov premtoi edhe ndihmë për dy studiues të institutit që të vazhdojnë studimet e doktoraturës në universitetet e Bullgarisë.

11.04.2013, Shkup

Instituti i Trashëgimisë Shpirtërore dhe Kulturore i Shqiptarëve 

…………………………………………………………………………………………………………………………………..