Reagim pas sulmit ndaj Muzeut të Manastirit

Pas konfirmimit të lajmit se sot herët në mëngjes një grup vandalësh ka sulmuar dhe demoluar Muzeun e Alfabetit në Manastir, Instituti i Trashëgimisë Shpirtërore e Kulturore të Shqiptarëve – Shkup e dënon këtë akt dhe dëshiron të vë në pah se ky veprim le që është në dëm të bashkëjetesës dhe harmonisë ndëretnike në Maqedoni, por flet edhe për faktin se si e perceptojnë ato grupe këtë ditë feste shtetërore kaq të rëndësishme për Republikën e Maqedonisë.

ITSHKSH-ja shfaq keqardhje që vandalët e kanë zgjedhur këtë ditë për ta kryer aktin e tyre makabër, ndërsa kërkon nga popullata shqiptare që mos të bie pre e viktimë e këtyre provokimeve, ngase dëshiron të besojë se megjithatë grupet e tilla nuk e reflektojnë vullnetin e shumicës së popullatës në Maqedoni, e cila tradicionalisht ka ditur ta respektojë kulturën e tjetrit.

Për këtë na shërben historia e Manastirit të para 105 viteve, kur shqiptarët aty ishin shumicë dhe, në bashkëveprim edhe me komunitetet e tjera, organizuan Kongresin e Alfabetit.

Ndërkaq, duke qenë institucion simotër më Muzeun e Alfabetit, në këto momente dëshpërimi ne i inkurajojmë të punësuarit aty se jemi me ata dhe, në përgjithësi, me të gjithë shqiptarët e Manastirit, që sigurisht janë të shqetësuar nga ky vandalizëm.

Duke qenë të bindur se ardhmëria evropiane e Maqedonisë nuk ndërtohet duke rrënuar kulturën e etnive të tjera në Maqedoni, u bëjmë thirrje institucioneve relevante të vendit që ta zbardhin këtë rast, kryerësit ta marrin dënimin e merituar, ndërsa mbetemi me shpresë se ky veprim do të jetë trokitje edhe në ndërgjegjen e të gjithë shqiptarëve të tjerë të Ballkanit dhe më gjerë për fatin e Manastirit dhe të Muzeut të Alfabetit.

Megjithatë, shpresojmë që aktet e tilla të mos përsëriten më në ambientin tonë.

 

Shkup, 24 maj 2013                                     Dr. Shefqet Zekolli,

                                                                              Drejtor i ITSHKSH

 

————————————————————————————————————————————————-

Facebook Koment

Shikoni gjithashtu

Drejtori Asani: Na pret bashkëpunim i frytshëm me Bashkësinë Islame

Shkup, 23 janar 2023 – Sot, drejtori i Institutit të Trashëgimisë Shpirtërore e Kulturore të …

Lini një Përgjigje