Ita (Drita) Faraxhi nga Izraeli, vizitoi ITSHKSH-në

Shkup, 10.09.2015 – Njëra nga të mbijeturat e Holokaustit në Shkup dhe Shkodër, Ita (Drita) Faraxhi nga Izraeli, vizitoi Institutin e Trashëgimisë Shpirtërore e Kulturore të Shqiptarëve në Shkup. Ajo po qëndron në Shkup vigjilje të shfaqjes premierë të filmit dokumentar në Shkup “Besa-Premtimi”, ku vetë znj.Faraxhi është njëra nga protagonistet e filmit.

Historia e saj familjare është një strorje shumë interesante, e cila flet për rolin e madh të shqiptarëve gjatë Luftës së Dytë Botërore, në shpëtimin e familjeve hebreje nga nazistët gjermanë dhe bullgarë.

Me këtë rast, drejtori i ITSHKSH-së, Dr.Skender Asani, e njoftoi mysafiren me rolin e madh historik të shqiptarëve gjatë LDB-së dhe misionin e tyre humanitar. Ai theksoi se ITSHKSH disponon me qindra e mijëra dokumente rreth fatit të familjeve hebreje të cilat u shpëtuan nga shqiptarët, por edhe me dokumente arkivore për të hebrenjtë e deporturar në kampin Treblinka të Polonisë, ku u asgjësuan mbi 7.000 hebrenj nga Maqedonia.

Ndryshe, shfaqja e filmit dokumentar “BESA-Premtimi”, do të bëhet më 11 shtator (e premte), ora 19.00 në Muzeun e Holokaustit në Shkup, ku do të marrin pjesë shumë ambasadorë dhe përfaqësues të lartë politikë dhe të klerit fetar në Maqedoni.

Ky event organizohet nga ITSHKSH, Ministria e Arsimit dhe Shkencës e RM-së, Komuna e Çairit dhe Muzeu i Holokaustit në Shkup.