Albumi me këngë nga viti 1903 “Zbulimi i Shqipërisë”, nga Vjena për ITSHKSH

Institutit të Trashëgimisë Shpirtërore dhe Kulturore të Shqiptarëve-Shkup i ka arritur nga Vjena e Austrisë botimi më i ri “Zbulimi i Shqipërisë”, që përmban këngë popullore shqiptare, në të cilin është e përfshirë edhe një CD. Këngët datojnë që nga viti 1903 dhe janë pjesë e folklorit tonë, që ka traditë të gjatë historike.

Për të qenë ky botim i çmuar pjesë e bibliotekës së Institutit tonë, është kujdesur Ardian Ahmedaja, autor i botimit dhe hulumtues shkencor i folklorit shqiptar në Institutin e Muzikës Popullore dhe Etnomuzikologjisë pranë Universitetit të Muzikës në Vjenë. Xhirimet janë nga muzika popullor në Shqipëri, që janë ruajtur në Arkivin fonogramik në Muzeun Shtetëror Etnologjik  në Berlin.

Instituti i Trashëgimisë Shpirtërore dhe Kulturore të Shqiptarëve-Shkup e falënderon kolegun Ahmedaja për këtë kontribut të tij, dhe inkurajon edhe qendrat e tjera apo autorë të tjerë që ruajnë trashëgimi të tilla kulturore të shqiptarëve, që t’i sjellin në bibliotekën tonë, e cila po bëhet një vatër e pasur e studimit të trashëgimisë tonë kulturore e shpirtërore. /www.itsh.edu.mk/