Takim për rivitalizimin e trashëgimisë kulturore të Ballkanit

Shkup, 12.02.2013 – Sot në Institutin e Trashëgimisë Shpirtërore e Kulturore të Shqiptarëve – Shkup ishte në vizitë një delegacion nga Turqia në përbërje: Dr. Nevzat Kaja, drejtor në pension i Bibliotekës së Dorëshkrimeve të Vjetra “Sulejmanije”, Prof. Dr. Xhihan Okujuxhu, profesor në Universitetin Teknik “Jildiz”, Prof. Dr. Nurettin Xheviz, profesor në Universitetin Teknik “Jildiz” dhe Prof. Dr. Jashar Ajdemir, profesor në Universitetin “Gazi”, të cilët këto ditë po qëndrojnë nëpër disa shtete të Ballkanit me qëllim të realizimit të projektit për rivitalizmin e trashëgimisë kulturore të Ballkanit. Ata u pritën nga drejtori i Institutit, Dr. Shefqet Zekolli dhe punëtorët e tjerë shkencorë.

Në këtë takim u diskutua veçmas për mundësinë e bashkëpunimit në fushën e digjitalizimit të dorëshkrimeve osmane që gjendet nëpër bibliotekat publike e private të vendit

Drejtori dhe të punësuarit e ITSHKSH-së, në lidhje me këtë projekt, u deklaruan se janë të gatshëm të inkuadrohen, duke dhënë ndihmesën e tyre, qoftë me kuadrot që mund të inkuadrohen në projekt, qoftë përmes ofrimit të hapësirave të Institutit. Me këtë rast punëtorët shkencorë të ITSHKSH-së u shprehën se janë të gatshëm t’i bashkëngjiten këtij projekti edhe për faktin se në këtë mënyrë ka mundësi të zbulohen edhe dorëshkrime shqipe që janë shkruar me shkronja osmane, të cilat mund të ndihmojnë për zbulimin e autorëve të rinj të këtyre trojeve, pa marrë parasysh se në çfarë fushe mund të jenë ato tekste.

Ky, në fakt, ishte takimi i parë i këtij niveli, sepse me fillimin e projektit, u la hapësirë që ky bashkëpunim të vazhdojë edhe më tej.

—————————————————————————————-