Panel – përkujtohet figura e Mehmet Akif Ersojit

Shkup – Autori i himnit turk, me prejardhje shqiptare, Mehmet Akif Ersoj është përkujtuar në Qendrën kulturore informative në Shkup, në këtë dhjetor ku shënohen edhe përvjetorët e lindjes dhe vdekjes së tij. Mehmet Akif Ersoj me prejardhje nga Shushica e Pejës në Kosovë është një nga figurat më shquara në Turqi si dhe i dalluar në shumë fusha si besimtar, dijetar, akademik, poet, shkrimtar, politikan, pedagog dhe deputet. Mirëpo edhe pse me prejardhje shqiptare ai nuk gëzon vendin e duhur në historinë e letërsisë shqiptare, u shpreh Zeqirija Ibrahimi, bashkëpunëtor shkencor i ITSHKSH-së, pjesëmarrës në panel.

“Arsyeja pse duhet të flasë në këtë temë është fakti se nga kultura shqiptare akoma nuk ka gjetur vend Mehmet Akif Ersoji në kuadër të historisë së letërsisë shqiptare edhe përkundër faktit se në historinë e letërsisë shqiptare janë përcaktuar tre kategori që një shkrimtar apo një vepër të bëhet pjesë e saj. Nëse shkrimtari është shqiptar, nëse vepra është shkruar në gjuhën shqipe dhe kriteri I tretë është në qoftë se vepra flet për çështjet që kanë të bëjnë me shqiptarët”, tha  Ibrahimi.

Ndërkohë Hysen Matoshi drejtor i Institutit Albanologjik të Prishtinës foli për Anti-despotizmin në poezinë e Mehmet Akif Ersoj. Ai tha mes të tjerash se Mehmet Akif Ersoj ishte një adhurues i madh i lirisë së popujve, të individit dhe padyshim një kundërshtar i madh i despotizmit.

“Mehmet Akif Ersoj adhuruesi i madh i lirisë, marshuesi drejt pavarësisë si alternativë rrënuese të robërisë despotike ka dëshmuar se pavarësisht fuqisë që zotërojnë despotët nuk do të ndihen të qetë asnjëherë qoftë edhe për faktin se zëri i lirisë do të gjallojë në azilin e tij të përhershëm në poezi”, tha Hysen Matoshi, drejtor i Institutit Albanologjik të Prishtinës.

Poashtu, në këtë panel, rreth figurës së Mehmet Akifit, folën edhe mysafirët:  Dr. Nexhmetin Turinaj (Hulumtues – Letrar, Turqi)., Prof. Dr Sevin Alil (Shef i Katedrës së Gjuhës dhe Letërsisë Turke, Fakulteti i Filologjisë “Bllazhe Koneski” – Shkup), dhe  Doc. Dr. Abdylkadir Hajber, moderator i panelit (Universiteti Gazi, Turqi).

Poeti i njohur Mehmet Akif Ersoj lindi në Stamboll më 20 dhjetor 1873 dhe vdiq më 27 dhjetor të 1936 po në Stamboll. Ai ishte ligjërues i historisë dhe letërsisë në disa universitete, si dhe njohës i mirë i Kur’anit dhe Hadithit. Përveç himnit kombëtar ai ishte autor i shumë poezive, të përmbledhura nën veprat ‘Safahat’ ose ‘Fletët’. /alsat-m/

 

……………………………………………………………………………………………………………………………………..

Të hënën (10.12.2012) në orën 18:00 në Sallonin 19:19 në QIK, Instituti i Trashegimise Shpirterore e Kulturore të Shqiptarëve në Shkup, në bashkëpunim me Qendrën Kulturore Turke “Junus Emre”, do të organizojë një panel në temën “Mehmet Akif Ersoj – autor i himnit turk”.

Pjesëmarrës në panel janë:

1. Prof. dr. Hysen Matoshi (Drejtor i Institutit Albanologjik të Prishtinës)

2. Dr. Zeqirija Ibrahimi (Instituti i Trashëgimisë Kulturore e Shpirtërore të Shqiptarëve në Maqedoni)

3. Dr. Nexhmetin Turinaj (Hulumtues – Letrar, Turqi)

4. Prof. Dr Sevin Alil (Shef i Katedrës së Gjuhës dhe Letërsisë Turke, Fakulteti i Filologjisë “Bllazhe Koneski” – Shkup)

5. Doc. Dr. Abdylkadir Hajber, moderator i panelit (Universiteti Gazi, Turqi).

                                                                                                Ju mirëpresim

——————————————————————————————————-