Akademia i hap dyert për Institutin dhe USHT-në

Shkup, 12.06.2014 – Instituti i Trashëgimisë Shpirtërore e Kulturore i Shqiptarëve – Shkup (ITSHKSH), si dhe Universiteti i Shtetëror Tetovës (USHT), janë dy prej institucioneve shqiptare që kanë nënshkruar marrëveshjen e bashkëpunimit me Akademinë e Shkencave dhe Arteve të Maqedonisë. Projekte të përbashkëta në sfera të ndryshme, asistencë shkencore dhe një prej projekteve që prej kohësh qëndron si ide në tavolinë – çelja e një sektori brenda Akademisë për studime shqiptare. Memorandumi i bashkëpunimit është nënshkruar mes ASHAM dhe të gjitha institucioneve shkencore në vend, instituteve shkencore dhe universiteteve shtetërore. Nënshkruesit e kësaj marrëveshje janë optimistë për bashkëpunimin e mëtejshëm, edhe pse memorandumet e këtij lloji deri tani kanë mbetur vetëm në letër. Sipas kryeakademikut Vllado Kambovski, ky memorandum synon të avancojë bashkëpunimin ndërinstitucional në sferat e historisë, literaturës, gjuhës dhe multikulturalzimit.

“Resurset tona njerëzore dhe materiale janë tejet të kufizuara dhe duhet që të shfrytëzohen sa më racionalisht. Të gjitha këto sfera shkencore qëndrojnë përpara disa sfidave jashtëzakonisht të komplikuara. Këtu janë çështjet që kanë të bëjnë me identitetin, zhvillimin e gjuhës, multikultura, marrëdhëniet me fqinjët dhe një sërë çështjesh të tjera janë përfshirë në sferën e aktiviteteve të këtyre institucioneve”, ka thënë kreu i ASHAM-it  Kambovski.

Drejtori i ITKSHSH, Shefqet Zekolli, pohon se kjo marrëveshje bashkëpunimi do të ndikojë në ngritjen profesionale, por edhe në parandalimin e keqkuptimeve dhe shtrembërimeve të fakteve historike.  “Ky memorandum vjen si pasojë edhe e frymës së re që ka sjellë brenda ASHAM-it kryetari Kambovski dhe një akt i tillë është edhe në favorin tonë, sepse në këtë mënyrë kemi qasje më të madhe deri tek institucionet e tjera relevante shkencore dhe kulturore. Është një mënyrë e mirë edhe për të marrë përvojat e të tjerëve, por edhe që kultura dhe shkenca shqiptare të ndikojë dhe të japë kontributin e vet në mënyrë që të mos vijë tek incidentet dhe shtrembërimet e fakteve dhe ngjarjeve që kanë ndodhur në të kaluarën”, thotë Zekolli.

Pavarësisht memorandumeve të bashkëpunimit të nënshkruara deri tani, shumë prej çështjeve të ndjeshme që kanë atakuar sferat më të larta akademike, siç ishte rasti pas publikimit të Enciklopedisë Maqedonase, marrëveshja e nënshkruar mes dy akademive në Shkup dhe Tiranë ka mbetur në letër dhe prej disa vitesh nuk ka pasur asnjë lloj lëvizje konkrete nga të dyja palët, edhe pas ndërrimit të krerëve drejtues. Po ashtu edhe pse Instituti i Trashëgimisë ka nënshkruar deri tani marrëveshje me institucionet e tjera vendase, projektet e përbashkëta deri tani janë realizuar duke anashkaluar çështje esenciale, apo projekte më kapitale, siç ishte rasti më i fundit i projektit “Sfidat maqedonase”. /www.koha.mk/

—————————————————————————————