ITSH Instituti i Trashëgimisë Shpirtërore e Kulturore të Shqiptarëve – Shkup
17 janar 2024 – Drejtori i Institutit të Trashëgimisë Shpirtërore e Kulturore të Shqiptarëve, Dr. Skender Asani, sot e priti në takim ambasadorin e Austrisë në Shkup, z. Martin Pamer.
Me këtë rast drejtori Asani e informoi Ambasadorin rreth historikut të Institutit, që nga themelimi e deri më sot, duke veçuar arritjet më të dalluara, siç është hapja e 18 departamenteve hulumtuese-shkencore, por edhe përkushtimi për mbrojtjen e trashëgimisë së Nënës Terezë, pastaj edukimi dhe hulumtimi mbi Holokaustin, si edhe manifestimet kryesore kulturore-shkencore për nder të figurave të rëndësishme të historisë dhe kulturës shqiptare. Drejtori foli edhe për vendimin e fundit, që ka kaluar në qeveri, për zyrtarizimin e gjashtë qendrave rajonale të trashëgimisë kulturore shqiptare.
Ambasadori Pamer, nga ana e tij, e përgëzoi drejtorin për kontributin e Institutit në krijimin e urave lidhëse mes kulturave të ndryshme dhe në punën hulumtuese të departamenteve për të nxjerrë në dritë botime të cilat e zbardhin historinë dhe prurjet albanologjike, por edhe japin ndihmesë në afirmimin e gjithmbarshëm kulturor e shkencor të vendit, si dhe për mirëkuptimin dhe bashkëpunimin e frytshëm mes komuniteteve të ndryshme në Maqedoninë e Veriut.
Meqë sivjet shënohet 30-vjetori i vendosjes së marrëdhënieve diplomatike mes Austrisë dhe Maqedonisë së Veriut, ambasadori Pamer shprehu gatishmëri për bashkëpunim dhe mbështetje të projekteve që e shënojnë këtë ngjarje.
Duke uruar që miqësia historike e shqiptarëve me Austrinë të vazhdojë, kjo në frymë të kontributit të jashtëzakonshëm që kanë dhënë albanologët austriakë në të kaluarën, drejtori Asani – në fund të takimit – ia dhuroi ambasadorit një përzgjedhje të botimeve të Institutit.
