ITSH Instituti i Trashëgimisë Shpirtërore e Kulturore të Shqiptarëve – Shkup
Shkup, 18 korrik, 2023 – Sot në ITSHKSH në një vizitë pune ishte Leslie Moorman, përfaqësuese e Zyrës së Lirisë Ndërkombëtare Fetare në Uashington dhe analisti politik në ambasadën e ShBA-ve në RMV, Adrian Ismaili.
Duke shprehur konsiderata të larta për këtë vizitë, drejtori Prof.dr. Skender Asani, i shoqëruar nga bashkëpunëtorët, prezantoi punën e deritanishme të ITSHKSH dhe në pika të shkurtra elaboroi rëndësinë e miqësisë dhe mbështetjes së vazhdueshme të institucioneve amerikane, që ishin edhe linja orientimi dhe referimi për Institutin.
Ai në vazhdim foli edhe për disa aspekte të kredos së tij intelektuale e shkencore që si pikënisje kanë modelin “njëri për tjetrin”, i bazuar në mirëkuptim dhe bashkëpunim, ku spikat vizioni për mbrojtjen e traditës shekullore, projekte të cilat kanë shërbyer si ura lidhëse në mes të feve dhe grupeve të ndryshme etnike brenda shtetit por edhe në rajon. Drejtori Asani veçoi veprimtarinë e Departamentit të Holokaustit si një nga arritjet më të mëdha që ka hapur rrugën për bashkëpunime të reja ndërinstitucionale për t’iu kundërvënë tendencave paragjykuese brenda shoqërisë. Ai prezantoi dhe përpjekjet për të kryer hulumtime dhe promovime rreth figurës së Nënës Terezë, përmes Departamentit dedikuar posaçërisht figurës së saj.
Znj. Leslie Moorman nga ana e saj inkurajoi drejtorin Asani që të vazhdojë në realizimin e planeve dhe ideve, si parakushte për një punë të suksesshme dhe për rrjedhojë ajo shprehu mirënjohen e saj për frymën tolerante e bashkëpunuese që po e kultivon ITSHKSH, si një model i veçantë në shoqëritë multietnike.
Në fund të takimit, drejtori Asani i dhuroi znj. Moorman disa botime të ITSHKSH.
