Drejtori i ITSHKSH-së, takim me drejtorin e Arkivit të Stambollit

Stamboll, 9.11.2015 – Drejtori i Institutit të Trashëgimisë Shpirtërore e Kulturore të Shqiptarëve në Shkup, Dr.Skender Asani, zhvilloi një takim të rëndësishëm me drejtorin e Arkivit të Stambollit, Dr.Onder Bajir.

Me të u dakorduan për shkëmbimin e materialeve arkivore të periudhës osmane, për çka ky arkiv posedon një fond të jashtëzakonshëm të dokumenteve për shqiptarët e Maqedonisë dhe më gjerë. Po ashtu në fokus të bashkëpunimit, do të jenë edhe organizimet e përbashkëta të natyrës hulumtuese-shkencore mes dy institucioneve.

Gjatë qëndrimit në Stamboll, në Panairin Ndërkombëtar të Librit që po mbahet këto ditë, është prezantuar edhe autori – historiani Skender Asani, drejtor i Institutit të Trashëgimisë Shpirtërore e Kulturore të Shqiptarëve në Shkup.

Me këtë rast, para një numri të madh të botuesve, autorëve, profesorëve universitarë, studentëve e vizitorëve të ndryshëm, në ditën e dytë të panairit janë promovuar veprat historike të Skender Asanit. Konkretisht, bëhet fjalë për botimet: “Shqiptarët e Shkupit ndër shekuj”, “Bibliografi për Shkupin”, “Kryengritja e përgjithshme shqiptare e vitit 1912, sipas burimeve bullgare”, “100 – vjetori i gazetës Shkupi”, “Shkupi shqiptar” (dokument), “Hasan Prishtina”(dokument), “Gjurmë nëpër kohë” (punime shkencore), “Vilajeti i Manastirit dhe LKSH në vitet 1911-1912‘ – dokumente bullgare, bashkëautorësi me Sevdail Demirin, “Çaulevi dhe vepra e tij për Shqipërinë”, etj.

Për opusin e gjerë shkencor të këtyre veprave, folën Prof.dr.Mustafa Ibrahimi, Dr.Adnan Ismaili dhe kryetari i Shoqatës së Botuesve Shqiptarë në Maqedoni, Qamil Rufati, të cilët vlerësuan veprat e Asanit, të cilat kryesisht i kushtohen të vërtetave historike për Shkupin.

Ndryshe, në stendën e Maqedonisë në këtë panair, u prezantuan rreth 500 vepra të zgjedhura nga autorë të ndryshëm nga Maqedonia, të shkruara në gjuhën maqedonase, shqipe, etj.

Delegacioni i Maqedonisë në Panairin e Stambollit përbëhet nga 15 anëtarë, përfaqësues të shoqatave botuese, përfaqësues të Ministrisë së Kulturës dhe autorë.