ITSH Instituti i Trashëgimisë Shpirtërore e Kulturore të Shqiptarëve – Shkup
Shkup, 11-12 nëntor 2019 – Dy ditë me radhë në Institutin e Trashëgimisë Shpirtërore dhe Kulturore të Shqiptarëve në Shkup, u zhvillua projekti “Zhvillimi i kulturës mediatike dhe promovimi i kulturës në media”, i financuar nga Ministria e Kulturës e Republikës së Maqedonisë së Veriut.
Aktiviteti nisi me hapjen e studios së re të Institutit, me kamera dhe pajisje moderne teknike, e cila do të shërbejë për nevojat e hulumtuesve shkencorë dhe për pasqyrimin e aktiviteteve të Institutit.
Më pas, nën drejtimin e koordinatores së këtij projekti, Valdeta Hajdari-Kasapi, u zhvillua panel diskutimi me temë “Zhvillimi i kulturës mediatike dhe promovimi i kulturës në media”, ku morën pjesë ekspertë të njohur nga fusha e gazetarisë, si: Augustin Palokaj, Afrim Gjonbalaj, Valentina Saraçini, Sefer Tahiri e Sevdail Demiri.
Drejtori i ITSHKSH-së, Skender Asani, e përshëndeti këtë aktivitet, si një mundësi më tepër për shtjellimin e temave të ndjeshme kulturore, si dhe pasqyrimin e tyre në media.
Ndërsa, në ditën e dytë, u zhvillua, ligjërata për paraqitje publike me ekspertë nga kjo fushë, si Irena Jakimova dhe Kosta Karpuzovski, ku të pranishmit, kryesisht studentë të mediave e komunikimit, u pasuruan me certifikata.
