U promovua libri i Hamit Kokalarit për Shkupin

Shkup, 25.11.2015 – Sot u promovua projekti i parë i përbashkët në mes dy instituteve shkencore të Shkupit e Tiranës, përkatësisht Institutit të Trashëgimisë Shpirtërore e Kulturore Të Shqiptarëve në Shkup dhe Institutit të Historisë së Qendrës së Studimeve Albanologjike në Tiranë.

Bëhet fjalë për botimin e librit “S H K U P I”- Konsiderata etnografike, historike, ekonomike (1942), e studiuesit dhe diplomatit të mirënjohur Hamit Kokalari, të cilin libër e redaktoi dhe përgatiti për botim Akademik Marenglen Verli.

Drejtori i Institutit të Trashëgimisë Shpirtërore dhe Kulturore të Shqiptarëve-Shkup, Doc. dr. Skender Asani, në rolin e botuesit, tha se fryma kombëtare shqiptare mund të mbahet gjallë vetëm me anë të bashkëpunimit të ndërsjellë kulturor, arsimor dhe shkencor midis Tiranës, Prishtinës e Shkupit, por edhe qendrave tjera kombëtare. “Rëndësia e Shkupit për shqiptarët e shqetësonte vazhdimisht Hamit Kokalarin, dhe për këtë kemi prova të shumta. Andaj, ai i kundërvihet tezave të Vaso Çubriloviqit, se nëse thyhet nyja shqiptare në Shkup, shumë lehtë do të thyhen edhe shqiptarët. Pikërisht për këtë, Kokalari i jep rëndësi të veçantë pikërisht Shkupit dhe shqiptarëve të këtij rajoni, duke e quajtur Shkupin – Porta e Shqipërisë”, theksoi Asani.

Burimi i materialit në këtë libër historik është Arkivi i Institutit të Historisë së Tiranës, fondi Etnografi. Drejtori i këtij Instituti, Akademik Beqir Meta, tha se këtu është nisma e bashkëpunimit të mirëfilltë, që do të vazhdojë edhe me projekte të tjera.

Në vazhdim foli profesori dhe akademiku nga Tirana, që u kujdes që ky libër të dalë në dritë, Marenglen Verli. Ai theksoi rëndësinë e madhe që ka ky libër për këto treva shqiptare të Maqedonisë, për të cilat kishte respekt të madh vetë Kokalari.

Botimin e këtij projekti e ka mbështetur Kryetari i Komunës Çair të Shkupit, z.Izet Mexhiti, i cili tha se rëndësia e këtij libri shtohet edhe më tepër, kur kemi parasysh autorin – një studiues, përkthyes e shkrimtar i madh, një diplomat i shquar, dhe një veprimtar i klasit të parë. “Hamit Kokalari ka lënë gjurmë të pashlyeshme në memorien historike të shqiptarëve të Shkupit, gjatë shërbimit të tij, edhe pse të shkurtër në konsullatën e Shqipërisë në Shkup, në vitet më të vështira të Luftës së Dytë Botërore. Ai me vizionin dhe largpamësinë prej një adhterari të pashoq, punoi parreshtur për të drejtat kombëtare të shqiptarëve të Shkupit  dhe trojeve tjera shqiptare. Por, ai na la trashëgim edhe këtë vepër shumë të rëndësishme, me të dhëna etnografike, historike dhe ekonomike për Shkupin”, tha Mexhiti.

Në promovim morën pjesë shumë studiues të historisë dhe mysafirë të tjerë.