Tekstet e historisë, pa paragjykime dhe ideologjizime

Shkup, O3.06.2015 – Sot në Shkup i filloi punimet konferenca shkencore ndërkombëtare “Historiografia dhe mësimdhënia e historisë në rajonet gjuhësore të sllavishtes jugore dhe shqipes”, nën orgnizimin e institutin gjerman “Georg Eckert”, Institutit të Trashëgimisë Shpirtërore e Kulturore të Shqiptarëve në Shkup dhe Institutit të Historisë Nacionale të Shkupit.

Konferenca filloi me fjalimet e drejtorëve të këtyre tre instituteve, Dragi Gjorgiev, Skender Asani dhe Erhard Fuks, të cilët theksonin nevojën e përmirësimit të teksteve mësimore të historisë në Maqedoni dhe rajon, në funksion të shkencës dhe në funksion të përmirësimit të raporteve ndëretnike te gjeneratat e reja, të cilët duhet të edukohen pa paragjykime etnike dhe ideologjike.

Sot në sesionin e parë, punimin e tyre të përbashkët e prezantuan Skender Asani dhe Alber Hani, me temë “Tekstet shkollore të historisë, ndërmjet mitit dhe ideologjisë”. Kurse, në sesion e dytë të konferencës, u prezantua Besnik Emini me temë “Aktivitetet kulturore të emigrantëve shqiptarë në Bullgari, në fund të shek.XIX dhe në fillim të shek.XX”.

Konferenca është e para e këtij lloji në rajon, dhe ka për qëllim hulumtimin, studimin dhe identifikimin e problemeve në lëmin e historiografisë dhe mësimdhënien e lëndës së historisë në rajonet sllavofolëse dhe shqipfolëse.

Në mesin e shumë studiuesve të njohur të historisë nga rajoni e bota, mori pjesë edhe Prof.dr.Natali Klajer nga Parisi. /www.itsh.edu.mk/