Promovohet veprimtaria botuese e ITSHKSH-së (FOTO)

Shkup, 2.3.2016 – Instituti i Trashëgimisë Shpirtërore e Kulturore të Shqiptarëve në Shkup, sot prezantoi veprimtarinë e vetë botuese gjatë vitit që lam pas. Bëhet fjalë për gjithsej 13 botime, në mesin e të cilave bëjnë pjesë botime autoriale, revista dhe botime të përbashkëta me institutet simotra.

Skender Asani, drejtor i ITSHKSH-së, tha se gjatë vitit 2015 jemi përkushtuar në veprimtarinë botuese, dhe bashkë me shumë projekte të tjera shkencore, kemi arritur që të etablohemi në mesin e instituteve të respektueshme vendore dhe ndërkombëtare. “Edhe gjatë këtij viti, ne po vazhdojmë me realizimin e programit tonë, ku kemi paraparaë disa botime nga sfera e trashëgimisë popullore, gjuhësisë, letërsisë e historisë. Me këtë rast po veçojmë konferencën ndërkombëtare për ballkanologjinë që do të mbahet kah fundi i vitit, si dhe konferencat shkencore në bashkëpunim me institutet e Prishtinës dhe Tiranës”, u shpreh Asani.  Sipas tij, gjatë këtij viti do të bëhet promovimi i veprimtarisë së Institutit edhe në disa qendra të rëndësishme evropiane dhe amerikane.

Promovimin e përshëndeti sekretari shtetëror i Ministrisë së Kulturës, Behixhudin Shehapi, i cili vuri në pah mbështetjen e kësaj ministrie ndaj Institutit, veçanërisht në planin e veprimtarisë botuese.

Rreth vlerave shkencore dhe artistike të veprave të botuara, foli studiuesi i njohur nga Shqiperia, Xhevat Lloshi, i cili nënvizoi veçoritë e këtyre botimeve, si dhe kontributin e çmuar që po jep Instituti i Shkupit për pasurimin e shkencës së albanologjisë.

Fjalë miradie për bashkëpunimin e ndërsjellë me ITSHKSH-në, tha edhe drejtori i Qendrës Memoriale të Holokaustit të Hebrenjëve të Maqedonisë, Goran Sadikario.

Sekretari shkencor i ITSHKSH-së, Sefer Tahiri, prezantoi veç e veç të gjitha botimet e realizuara gjatë vitit 2015, të cilat tani janë përfshirë edhe në një katalog të veçantë me të gjitha botimet e Institutit që nga fillimi i punës e deri më sot.

Për dallim nga vitet e kaluara, kur objektivisht ka munguar mbështetja financiare nga Ministria e Arsimit, këtë vit ky dikaster së bashku me Ministrinë e Kulturës kanë qenë mbështetësit kryesorë të projekteve dhe aktiviteteve shkencore të ITSHKSH-së përgjatë vitit, ndërsa duhet cekur edhe ndihma e pamohueshme e Komunës së Çairit, por edhe e organizatës së respektuar ZFD nga Gjermania.

Për bashkëpunimin e sinqertë në disa projekte, drejtori i ITSHKSH-së, Skender Asani, i ndau mirënjohje drejtoreshës së forumit gjerman ZFD me seli në Shkup, Silke Majer Wit.

Aktiviteteti u pasurua edhe me disa pikë artistike, interpretuar nga Jeta dhe Ermal Mehmeti. /www.itsh.edu.mk/