Promovohet studimi i dr.Agim Lekës: “SEMANTIKA E DRAMËS SHQIPE – NGA SANTORI DERI TE FLOQI”

Në ITSHK sot u përurua sot studimi “Semantika e dramës shqipe – nga Santori deri te Floqi” i autorit dr. Agim Leka, profesor i katedrës së Gjuhës dhe Letërsisë Shqipe në Universitetin e Shkupit. Për vlerat shkencore të librit folën teorikët e njohur të letërsisë, akademik Ali Aliu, prof.dr. Floresha Dado e prof.dr. Dhurata Shehri nga Universiteti i Tiranës

– Shkup, 25 qershor 2012 – Në ambientet e Institutit të Trashëgimisë Shpirtërore e Kulturore të Shqiptarëve në Maqedoni, sot u përurua studimi “Semantika e dramës shqipe (nga Santori deri te Floqi)” i autorit Agim Leka. Megjithëse botimi është i Shtëpisë Botuese “Arbëria Design”, për shkak të rëndësisë që ka kjo vepër për shkencën e letërsisë te ne, si dhe për shkak të risisë dhe veçantisë që ka, ky promovim u organizua pikërisht nga një institucion shkencor, si është ITSHKSH.

Meqë bëhet fjalë për një vepër të dimensioneve shkencore përtej kornizave të shqiptarëve të Maqedonisë, këtë promovim, përveç recensentëve të veprës, e nderuan edhe personalitete të tjera të larta të kësaj fushe. Në fakt promotorë të këtij libri ishin akademik Floresha Dado dhe prof. dr. Dhurata Shehri nga Shqipëria dhe akademik Ali Aliu nga Maqedonia.

Akademik Dado në fjalën e saj theksoi rëndësinë e madhe që ka kjo vepër në studimin e dramës shqipe, një fushe – që sipas saj – i mungon letërsisë shqipe. Ajo tha se vepra e Agim Lekës është një vepër që i ka tejkaluar përmasat e një studimi lokal, madje edhe kombëtar, ngase sjell edhe në letërsinë shqipe një qasje të re, pak të kultivuar deri më tash, për çka ajo e përgëzoi autorin, botuesin, si edhe organizatorin e promovimit.

Ndërkaq Akademik Aliu në fjalën e tij u ndal në faktin se viteve të fundit edhe shqiptarët e Maqedonisë kanë filluar të prodhojnë vepra që paraqesin një kthesë të rëndësishme në zhvillimin e shkencave albanologjike në Maqedoni, duke dëshmuar kështu se qendrat shkencore e arsimore të kësaj hapësire tashmë janë kthyer në epiqendër të kësaj shkence dhe se tashmë edhe ne mund të mburremi se kemi çka të ofrojmë në plan kombëtar si vlerë shkencore të këtyre përmasave.

Ndërkaq prof. Dhurata Shehri foli për dimensionet e reja shkencore që i sjell kjo vepër, duke vënë theksin në rëndësinë që ka katedra e albanologjisë në Shkup për avancimin e kësaj shkence në përgjithësi.

Në fund të pranishmëve iu drejtua edhe autori i veprës, prof. Agim Leka, i cili i falënderoi referuesit për fjalët që i thanë, i falënderoi recensentët dhe botuesin e veprës, si edhe organizatorin e promovimit, ITSHKSH-në.

Pjesëmarrësve të këtij promovimi iu drejtua edhe drejtori i Instituti, dr. Shefqet Zekolli, i cili tha se Instituti, përveç konferencave shkencore e botimeve të rregullta, kur e sheh të arsyeshme, organizon edhe promovime të librave, të cilat i vlerëson si të rëndësishme për shkencën e albanologjisë, ku ai e kategorizon edhe këtë studim.

 

……………………………………………………………………………………………………………………………………………………….