Promovohen pulla postare me figurat e Ali pashë Tepelenës dhe Ibrahim Temos

Shkup, 25.11.2015 – Në shenjë të manifestimeve me rastin e Festës së Flamurit Shqiptar, Posta e Maqedonisë dhe Instituti i Trashëgimisë Shpirtërore e Kulturore të Shqiptarëve (ITSHKSH) në Shkup, sot promovuan pullat e reja postare me dy figurat e shquara të historisë kombëtare shqiptare, Ali pashë Tepelena dhe Dr. Ibrahim Temo.

Nikoqiri i manifestimit, Dr. Skender Asani, theksoi se produkt i bashkëpunimit të vazhdueshëm mes Institutit dhe Postës, janë edhe këto dy pulla postare. “Figurat Ali pashë Tepelenës dhe Dr. Ibrahim Temos, lidhin epoka historike, dhe përçojnë mesazhe paqeje dhe unifikimi deri në ditët e sotme”, theksoi Asani.

Drejtori i Postës së Maqedonis, Faadis Rexhepi, tha se kompania që ai drejton, respekton vlerat kulturore dhe historike, andaj në Programën  për botimin e pullave postare ka përfshirë edhe pullat postare të cilat po i promovjmë sot,duke dhënë kontributin tonë për figurën dhe veprimtarinë e këtyre dy kolosëve. “Pullat postare janë të përjetshme,të vetmet vepra arti ku arti në një hapsirë shumë të vogël por jo të parëndësishme paraqet figura, epoka, veprimtari. Ajo është ambasadori i vetëm që i tejkalon kufijtë,kohën dhe largësitë, i bashkon njerëzit dhe fatet e tyre”, theksoi drejtori Rexhepi.

Historiani, Prof.Dr.Nebi Dervishi, u ndal në biografinë dhe veprimtarinë e rëndësishme kombëtare të këtyre dy figurave historike. Ai tha se promovimi i sotëm lidhet me shënimin e 275 vjetorit të lindjes së Ali pashë Tepelenës, dhe 150 vjetorit të lindjes së Dr.Ibrahim Temos në Strugë. “Që të dy këto figura, kanë dhënë një kontribut të madh për lëvizjet kombëtare shqiptatre, në periudhat në të cilat jetuan dhe vepruan”, u shpreh Dervishi.

Ndryshe, dy pullat postare të cilat u promovuan sot, do të gjinden në shumë letra,kartolina,dërgesa postare, do të udhëtojnë anembanë botës duke përcjellur një ide të fuqishme për tejkalimin e distancave. Pullat postare janë me vlerë nominale prej 16 dhe 18 den,të shtypura në tirazh prej nga  8000 ekzemplarëve, ndërsa autor është Llarisa Zhivkovska Donev nga Byroja e filatelise pranë Postës së Maqedonisë.