Prezantohen “Vlerat e trashëgimisë kulturore të shqiptarëve”

Shkup, 27.05.2014 – Instituti i Trashëgimisë Shpirtërore dhe Kulturore të Shqiptarëve (ITSHKSH) në Shkup, sot në lokalet e Gjimanzit “Zef Lush Marku” në Shkup, realizoi projektin “Vlerat e trashëgimisë kulturore të shqiptarëve dhe identiteti kombëtar”. Me këtë rast, para nxënësve dhe profesorëve të shumtë, studiuesit e ITSHKSH-së, paraqitën tema të ndryshme dhe interesante të cilat kryesisht kanë të bëjnë me kultivimin e trashëgimisë kulturore e shqiptarëve në Maqedoni.

Fillimisht, drejtori i ITSHKSH-së, Dr.Shefqet Zekolli, tha se përmes këtij projekti, Instituti vazhdon me komunikimin e drejtpërdrejtë me të gjitha shtresat potenciale, të cilat merren ose në të ardhmen do të mund të merren me ruajtjen e trashëgimisë kulturore e shpirtërore të shqiptarëve në Maqedoni.

Në emër të gjimnazit, foli profesoresha Luana Basha, e cila vlerësoi lartë konstributin e ITSHKSH-së, në transmetimin e njohurive deri tek nxënësit, të cilët në të ardhmen do të mund më profesionalisht të merren me këto problematika.

Udhëheqësi i projektit, Dr. Sefer Tahiri, tha se ky projekt synon  promovimin dhe afirmimin e trashëgimisë kulturore, materiale dhe shpirtërore të shqiptarëve para gjeneratave të reja, sepse vetëm duke e njohur vetveten, në kushtet e globalizimit, mund ti njohim vlerat dhe identitetin e të tjerëve.

Më tej, u paraqitën këto studiues me punimet e tyre: Dr. Skender Asani “Rëndësia e trashëgimisë kulturore të shqiptarëve në Shkup midis dy luftërave botërore”; Mr. Besnik Emini: “Trashëgimia familjare dhe ruajtja e saj”; Dr. Sevdail Demiri: “Shtypi shqiptar në Maqedoni, si trashëgimi kulturore”; Dr. Zeqirja Ibrahimi: “Gjuha dhe letërsia shqipe, pjesë e rëndësishme e trashëgimisë kulturore dhe identitetit të shqiptarëve”; Mr. Hidajete Azizi: “Rëndësia e emrave vetjakë”; Prof.dr. Izaim Murtezani: “Folklori dhe vlerat e tij, pjesë e rëndësishme e trashëgimisë kulturore dhe identitetit të shqiptarëve”.

Me mjaft interesim, u përcoll edhe filmi dokumentar “Një jetë në ikje – (Zejet në Maqedoni)”, me narrator Mr.Besnik Eminin.  /www.itsh.edu.mk/

——————————————————————————————————————————————