Nxënësit njihen me vlerat e trashëgimisë kulturore

1Shkup, 17.04.2013 – Instituti i Trashëgimisë Shpirtërore dhe Kulturore të Shqiptarëve të Maqedonisë, në vigjilje të 18 Prillit – Ditës Ndërkombëtare të Monumenteve dhe Vlerave Arkeologjike, sot realizoi projektin “Vlerat e trashëgimisë kulturore të shqiptarëve dhe identiteti kombëtar”.

Për të përcjellur deri tek gjeneratat e reja domethënien e këtyre vlerave të trashëgimisë tonë kulturore, si dhe lidhshmërinë e tyre me identitetin tonë kombëtar, ligjeruan punëtorët shkencorë të ITSHKSH-së dhe bashkëpunëtorët të jashtëm shkencor. Audiencën e kësaj punëtorie e përbënin nxënësit e zgjedhur të shkollave fillore të Shkupit: “Liria”, “Imri Elezi” dhe “Kongresi i Manastirit”.

Fillimisht drejtori i ITSHKSH-së, Dr.Shefqet Zekolli, foli për rëndësinë që të rinjtë tanë, që nga moshat më të hershme, ta njohin trashëgiminë tonë kulturore, shpirtërore dhe historike, në mënyrë që të ardhmen të bëhen personalitete sa më të kompletuar në të gjitha fushat.

Drejtori i Muzeut të Alfabetit Shqip të Manastirit, Gazemnd Hoxha, i njoftoi nxënësit me historikun e alfabetit të sotëm të gjuhës shqipe, dhe për vetë institucionin e rëndësishëm dhe unikat që ai e drejton, dhe që ka një rëndësi të posaçme për kulturën dhe identitetin tonë kombëtar.

Më tej me ligjerata në tema të ndryshme nga historia, arkeologjia, kultura, folklori, gjuha, letërsia, etj., u paraqitën studiuesit: Mr.Skender Asani, Dr.Mixhait Pollozhani, Dr.Naim Halimi, Mr.Besnik Emini, Dr.Izaim Murtezani, Dr.Bukurie Mustafa, Dr.Zeqirja Ibrahimi, Mr.Hidajete Azizi, etj.

Ambasada amerikane në Shkup rregullisht e ka mbështetur punën e ITSHKSH-së në ruajtjen e trashëgimisë tonë kulturore e shpirtërore. Andaj, në shenjë falënderimi, pikërisht në vigjilje të Ditës botërore të trashëgimisë, Instituti ndau një plaketë-mirënjohje për Ambasadën amerikane në Shkup, të cilën e pranoi këshilltari politik i kësaj ambasade, z.Spencer Fields. Mysafiri amerikan falënderoi për bashkëpunimin e frytshëm dhe iu përgjigj disa pyetjeve të nxënësve të cilët interesoheshin për përvojat amerikane në ruajtjen e trashëgimisë kulturore.

Projekti “Vlerat e trashëgimisë kulturore të shqiptarëve dhe identiteti kombëtar”, është mbështetur nga Ministria e Kulturës e Republikës së Maqedonisë.

2

3

4

……………………………………………………………………………………………………………………………………………

Facebook Koment

Shikoni gjithashtu

Drejtori Asani: Na pret bashkëpunim i frytshëm me Bashkësinë Islame

Shkup, 23 janar 2023 – Sot, drejtori i Institutit të Trashëgimisë Shpirtërore e Kulturore të …

Lini një Përgjigje