MASH promovon 14 tituj të rinj të librave shkencor

Shkup, 17 nëntor – Ministri i Arsimit dhe Shkencës, z.Abdilaqim Ademi sot mori pjesë në promovimin e 14 titujve  të rinj të librave universitar të përkthyera dhe të botuara në gjuhën shqipe. Titujt e rinj të cilët u promovuan në hapësirat e Institutit për Trashëgimi Shpirtërore  dhe Kulturore të Shqiptarëve janë nga lëmia  e Turizmit, Arteve figurative, shkencave  matematiko natyrore ,  Transport dhe telekomunikacion dhe Shkencave të makinerisë dhe elektroteknikë
Me këtë rast Ademi theksoi se rëndësia dhe roli i librit gjithmonë kanë  qenë  të çmuar dhe të pa zëvendësuar. Brendësia  e çdo libri në vete mbanë thesaret më të mëdha të cilat i krijon dhe i posedon një individ.  Sa më i ditur të jetë njeriu, aq më mik e ka librin.Shkrimtari, historiani dhe filozofi francez, Volteri , në kohën kur jetoi dhe veproi, shkroi: “Në jetë  kam pasur vetëm një mik të vërtetë dhe të sinqertë – librin”. Që të gjithëve na është e njohur se arsimi është çelësi i zhvillimit të qëndrueshëm të çdo shoqërie. Një arsim të tillë të dëshiruar mund të ndërtojmë nëse krijojmë libra, tekste shkollore, me fjalë të përgjithësuar – literaturë cilësore “ tha ministri Ademi.
Ademi rikujtoi se  në vitin 2009 Qeveria e Republikës së Maqedonisë filloi me realizimin e një projekti shumë të rëndësishëm “ Përkthimi i 1000 librave shkencorë, profesional me të cilat studiohet në universitetet më të mira dhe më me renome në SHBA dhe  Angli, kurse nga lëmia e drejtësisë (edhe në) në Francë dhe Gjermani”.Deri më tani janë përkthyer gjithsej 919 tituj, tha Ademi, ky projekt i cili  është i një rëndësie të veçantë për studentët tanë, tani është futur në fazën përfundimtare dhe pritet diku në fillim të vitit të ardhshëm të promovohen edhe 81 titujt tjerë për përkthim dhe botim.
“Promovimi i cilësisë  në arsimin e lartë nuk ndalet me përfundimin e këtij projekti.  Vazhdimësia  e këtij projekti tani më është siguruar, jo në këtë formë, por me qëllim të njejtë.  Me  ndryshimet e këtij viti të Ligjit për arsim të lartë, për nevojat e institucioneve të arsimit të lartë në vendin tonë, çdo vit, parashikohet të përkthehen dhe botohen 50 tituj të ri të librave universitar, të cilat përdoren në 10 universitetet më të mira të ranguara sipas listës së Shangajit, të cilat (në rend të parë) do i mundësojnë studentëve në Republikën e Maqedonisë, në kontinuitet të jenë me të gjitha ngjarjet, të arriturat, rezultatet, hulumtimet, informacionet, praktikat, metodat, teknikat, format dhe ngjajshëm, nga lëmitë në të cilat studiojnë” theksoi Ademi.
Ministri potencoi se një nismë e tillë do ndikojë dukshëm edhe në përpjekjet e studentëve për ndërtimin e personaliteti të tyre për t’iu përgjigjur kërkesave që dalin nga tregu i punës, por gjithashtu edhe për t’i përballuar sfidave të globalizmit dhe zhvillimit tekniko-teknologjik. /Zhurnal.mk/