ITSH Instituti i Trashëgimisë Shpirtërore e Kulturore të Shqiptarëve – Shkup
15.12.2017 – Sot në Pogradec të Shqipërisë, me rastin e takimit të përbashkët punues mes Qeverisë së Republikës së Maqedonisë dhe asaj të Shqipërisë, u nënshkrua edhe memorandumi i bashkëpunimi ndërmjet Institutit të Trashëgimisë Shpirtërore e Kulturore të Shqiptarëve – Shkup dhe Drejtorisë së Përgjithshme të Arkivave të Republikës së Shqipërisë.
Memorandumi u nënshkrua nga drejtorët respektiv, dr.Skender Asani dhe dr.Ardit Bido, nën kujdesin e kryeministrave Zoran Zaev dhe Edi Rama.
Objekt i këtij memorandumi janë projekte të përbashkëta hulumtuese në fushën e historisë së shqiptarëve dhe bashkësive etnike që jetojnë në të dy shtetet, shkëmbimi i kontakteve dhe bashkëpunimi në fuqizimin e bashkëpunimit rajonal dhe ndërkombëtar, ndihma në fuqizimin e kapaciteteve të kuadrit profesional dhe shkencor, fuqizimi i partneritetit me institucionet e tjera, shkëmbimi i dokumenteve dhe literaturës profesionale, si dhe shfrytëzimi i ndërsjellë i kapaciteteve materiale dhe resurseve ekzistuese. Palët synojnë të nxisin fuqizimin e bashkëpunimit, përkrahjes dhe ndihmës së ndërsjellë në shkëmbimin e dokumenteve arkivore historike, literaturës profesionale dhe revistave shkencore, të cilat do të jenë në dobi të ndërsjellë.
Kjo është një nga pesë marrëveshjet e nënshkruara sot në Podradec ndërmjet Republikës së Maqedonisë dhe Republikës së Shqipërisë.
