ITSHKSH, marrëveshje bashkëpunimi me Kolegjin AAB-Prishtinë

Prishtinë, 21.7.2016 – Instituti i Trashëgimisë Shpirtërore e Kulturore të Shqiptarëve – Shkup, sot në Prishtinë nënshkroi marrëveshje bashkëpunimi me Kolegjin universitar AAB. Marrëveshja që u nënshkrua nga drejtori i ITSHKSH-së, Skender Asani dhe prorektori i Kolegjit AAB, Shemsedin Vehapi, ka për qëllim bashkëpunimin e dy institucioneve në promovimin e arsimit e hulumtimeve shkencore nëpërmjet aktiviteteve të përbashkëta.

Kjo marrëveshje parasheh mundësinë e bashkëpunimit lidhur me organizimin konferencave shkencore, simpoziumeve, seminareve, aktivitete për ngjarjet dhe figurat historike, apo tema nga fusha e albanologjisë, trashëgimisë kulturore, historisë dhe marrëdhënieve ndërkombëtare, botime të përbashkëta, shkëmbimin e personelit, shkëmbimin e vizitave të organizuara tematike në të dyja institucionet, konkurrimin e përbashkët në projekte në nivel kombëtar dhe ndërkombëtar, etj.

Kolegji universitar AAB, është institucioni më i madh universitar privat në Kosovë, i shtrirë në Prishtinë, Gjakovë dhe Ferizaj, në të cilin studiojnë mijëra studentë në dhjetëra drejtime atraktive të nivelit baçelor dhe master.