ITSHKSH: E dënojmë gjuhën dhe qasjen antisemite të disa qarqeve në Maqedoni

Pasi që këto ditë nëpër media dhe në qarqe të caktuara u plasuan hapur qasje antisemite, duke e mohuar holokaustin e hebrenjve gjatë Luftës së Dytë Botërore, por edhe u promovuan simbole fashiste, Instituti i Trashëgimisë Shpirtërore e Kulturore të Shqiptarëve ngre zërin e arsyes dhe e dënon këtë gjuhë antisemite dhe këtë qëndrim fashist të atyre qarqeve, që – për fat të keq – shpesh gjejnë mbështetje edhe nga organizata politike.

Ta ofendosh tjetrin mbi baza etnike, siç veprohet shpesh ndaj shqiptarëve në Maqedoni, si dhe ta mohosh holokaustin e të promovosh simbole fashiste, këto janë shenja se Maqedonia le që nuk po ecën në drejtim të vlerave perëndimore dhe integrimit në botën e qytetëruar, porse po shënon regres që mund të rezultojë me pasoja serioze jo vetëm për të ardhmen e Maqedonisë dhe të qytetarëve të saj.

Duke qenë të ndërgjegjshëm për peshën historike të këtyre momenteve, si dhe duke mos dashur të lejojmë që në asnjë mënyrë të na përsëritet historia, ITSHKSH u bën thirrje të gjitha institucioneve relevante në vend që ta gjykojnë këtë veprim dhe të distancohen prej tij, që kështu këto veprime të dekurajohen dhe të mos zënë vend në ambientin tonë. Përveç kësaj, kërkojmë nga Prokuroria Publike që ta marrë në konsideratë këtë rast dhe të ngrejë padi penale kundër atyre që bëjnë thirrje fashiste dhe anisemite.

Me këtë rast ITSHKSH-ja rithekson se – ashtu siç ndihmuan shqiptarët në shpëtimin e hebrenjve në Luftën e Dytë Botërore – edhe hebrenjtë e Maqedonisë sot në Institutin e Trashëgimisë Shpirtërore e Kulturore të Shqiptarëve mund të llogarisin në një institucion mik, që kujdeset njësoj si për kulturën dhe trashëgiminë e shqiptarëve dhe që këtë e ka dëshmuar disa herë edhe përmes formave të bashkëpunimit konkret. Në këtë drejtim, ne para do kohe organizuam ekspozitën “Guximi qytetar në kohë të vështira” bashkë me Institutin e Historisë Nacionale, Qendrën e Holokaustit të Hebrenjve në Maqedoni dhe Bashkësinë Hebraike në vend.

Të mësuar me traditën e lashtë shpirtërore të këtyre hapësirave, ne mendojmë se duhet të jemi maksimalisht syhapur dhe të kujdesshëm, sepse një pakujdesi e vogël, si ajo para Luftës së Dytë Botërore, mund të sjellë pasoja fatale, që mund t’i qajmë dhe vuajmë edhe në shumë gjenerata.

 

Me nderime,

 

Shkup,                                                                                   Drejtori i ITSHKSH-së

  1. 3. 2016 Dr. Skender Asani

 

Facebook Koment

Shikoni gjithashtu

Drejtori Asani: Na pret bashkëpunim i frytshëm me Bashkësinë Islame

Shkup, 23 janar 2023 – Sot, drejtori i Institutit të Trashëgimisë Shpirtërore e Kulturore të …

One comment

Lini një Përgjigje