ITSHKSH dhe Shkupi në 140 vjetorin e Lidhjes së Prizrenit

-Sot në Prizren, me një sërë manifestimesh është shënuar  140 vjetori i Lidhjes së Prizrenit. Në konferencën shkencore ndërkombëtare, pjesë e organizimit ishte edhe Instituti i Trashëgimisë Shpirtërore e Kulturore i Shqiptarëve në Shkup, përmes drejtorit dr.Skender Asani (i cili u paraqit me një fjalë përshëndetëse), dhe punëtorit shkencor dr.Besnik Emini (i cili u paraqit me një kumtesë shkencore).

Në vijim, fjalimi integral i drejtorit të ITSHKSH-Shkup, dr.Skender Asani:

Të nderuar të pranishëm,

Është nderë i madh për të gjithë ne, që sot jemi mbledhur në Prizrenin historik, piemontin e shqiparizmës, për të kujtuar 140 vjetorin e Lidhjes së Prizrenit, si njëra ndër ngjarjet më madhore të historisë sonë kombëtare.
Lidhja e Prizrenit ishte e para lëvizje çlirimtare me karakter kombëtar, në të cilën morën pjesë të gjitha krahinat shqiptare, dhe në të cilën u kombinuan të gjitha format e luftës çlirimtare, që nga kuvendet popullore e deri te parashtresat politike, që nga misionet diplomatike e deri te kryengritjet e armatosura për liri dhe bashkim kombëtar.
Një hallkë shumë e rëndësishme e këtij organizimi ushtarak dhe politik të shqiptarëve, 140 vjet më parë, ishte edhe Shkupi, përkatësisht dega e Lidhjes së Prizrenit në Shkup, e personifikuar me emrin e atdhetarit të shquar, Jashar bej Shkupit. Kontributi i tyre në ato procese të rëndësishme kombëtare, mbetet jashtëzakonisht i rëndësishëm për të gjitha kohërat.
Edhe sot në këtë konferencë shkencore ndërkombëtare në Prizren, kam nderin që bashkë me kolegët e Institutit të Trashëgimisë Shpirtërore e Kulturore të Shqiptarëve në Shkup, të prezantojmë Shkupin dhe trojet shqiptare që administrativisht mbetën jashtë trojeve shqiptare, si rezultat i padrejtësive që në atë kohë bënë fuqitë e mëdha.
Të nderuar të pranishëm,
Pa dashur që t’ju marr kohë më tepër, duke përshëndetur këtë organizim shkencor nga institutet kredibile shkencore të Prishtinës, Tiranë e Shkupit, nën kujdesin e Qeverisë së Republikës së Kosovës dhe Këshillit për shënimin e vitit jubilar të Skënderbeut, më lejoni që të theksoj edhe nevojën që këto bashkëpunime të jenë më intensive dhe në frymën e bashkimit tonë kulturor, si arma më e fuqishme kundër tendencave të qarqeve të ndryshme për ndasi dhe fragmentarizim të indit tonë kombëtar.

Dr. Skender Asani, ITSHKSH
Prizren, 10.06.2018

Facebook Koment

Shikoni gjithashtu

Drejtori Asani: Na pret bashkëpunim i frytshëm me Bashkësinë Islame

Shkup, 23 janar 2023 – Sot, drejtori i Institutit të Trashëgimisë Shpirtërore e Kulturore të …