ITSHKSH dhe LOGOS-A, promovojnë disa vëllime me dokumente

“Tokat e liruara 1941-1944” nga Qerim Lita dhe “Shkupi ndërmjet dy luftërave botërore” me autor Skender Asani janë dy titujt e ri që sjell Shtëpia Botuese “Logos A”në bashkëpunim me ITKSH-në për lexuesin shqiptar. Në këto dy studime dhe hulumtime historike, të cilat u promovuan në Shkup, autorët u sjellin lexuesve dokumente të një periudhe të ndjeshme historike që deri më tani kanë qenë të mbuluara nga pluhuri i arkivave të Shqipërisë, Kosovës dhe Maqedonisë dhe si të tilla kanë qenë të paprekura nga duart e studiuesve dhe të panjohura për opinioni e gjerë, raporton SHENJA.

Gjatë përpilimit të veprës “Tokat e liruara 1941-1944”, autori i saj, Qerim Lita, i saj ka përdorur mbi 850 dokumente arkivore, të cilët në mënyrë të detajuar paraqesin organizimin e pushtetit civil në viset e Kosovës, Dibrës dhe Strugës të cilët gjatë kohës së sundimit fashist iu bashkuan Shqipërisë.  Gjatë promovimit të librit, Lita shpalosi disa nga to.

“Në Kosovë emrova komandant të shtabit kryesor në Kosovë por Kosmet, ashtu e njihnin, Kosmet Fadil Hoxhën, i cili nuk ka asnjë ushtar shqiptar. Ja, kjo ishte e vërteta. Fadil Hoxha komandant pas asnjë ushtar shqiptar”, deklaroi Qerim Lita, autor i librit.

Duke folur mbi “Tokat e liruara”, referuesit Beqir Meta dhe Halil Purellku thanë se ky libër sjell shumë informacione të pasura dhe të qarta, për periudhën komuniste e cila, sipas tyre, ruan akoma pasojat deformuese.

“Ky botim dokumentar është një antihelm shërues për historgrafinë tonë që ende ruan pasojat deformuese faktologjike e botëkuptimore të histografisë komuniste e cila ka qenë mbisunduese për 50 vjet”, u shpreh Beqir Meta, Akademik nga Shqipëria.

“Tani krijohet edhe  një mundësi për krijuesit që në këtë përmbledhje për çështje konkrete një informacion të pasur dhe në shumë raste shumë të ri e që gjatë analizës shkencore do t’ju shërbejë si referencë serioze për ballafaqimin e fakteve historike të proviencave të ndryshme”, tha Halil Purellku, Profesor.

Ndërkohë, “Shkupi ndërmjet dy luftërave botërore”, siç u shpreh autori i saj, Skender Asani, ka të bëjë me mbijetesën e shqiptarëve si dhe sulmet e ashpra të pushtuesve të ndryshëm ndaj qytetit të Shkupit.

“Shkupi ka qenë synim i shumë perandorive por më të ashpra ishin synimet e shteteve fqinjë dhe sidomos të Serbisë. Sepse ajo që në mesjetë e kishte shpallur edhe kryeqendër të perandorisë së saj dhe ajo dëshironte që kjo kryeqendër të jetë ekskluzive e saj”, deklaroi Skender Asani, autor i librit.

Referuesit e librit në fjalë, Nuredin Ahmeti dhe Sevdail Demiri, u shprehën se ky botim është rezultat i një pune hulumtuese disavjeçare të autorit në arkivat e Maqedonisë, Shqipërisë dhe Kosovës duke hulumtuar fonde nga më të ndryshme që ruhen në këto arkiva.

“Në periudhën ndërmjet dy luftërave botërore padrejtësitë e ushtruara nga pushteti i atëhershëm ndaj një pjese të popullatës së Shkupit me rrethinë kishin marrë përmasa shqetësuese”, deklaroi Nuredin Ahmeti, Profesor.

“Përmes dokumenteve të siguruara kryesisht nga arkivat e Maqedonisë, Shqipërisë dhe Kosovës, dalin të pah të vërtetat të paparamenduara për gjendjen e Shkupit dhe shqiptarëve në periudha mjaft delikate të se kaluarës tonë. Natyrisht Shkupi është kryefjalë e këtyre vëllimeve”, tha Sevdail Demiri, Profesor.

Libri “Tokat e liruara”, përbëhet prej katër vëllimeve, ndërsa “Shkupi ndërmjet dy luftërave botërore” është me dy vëllime.

Teuta Buçi /SHENJA/

Burimi origjinal i lajmit: http://shenja.tv/logos-a-promovohen-libra-me-dokumente-nga-arkiva/