ITSHKSH, bashkëpunim me Institutin për Hulumtime Ballkanike në Edirne

Në Edirne të Turqisë, në suaza të manifestimit “Ditët e Kulturës Maqedoni-Turqi”, u nënshkrua një marrëveshje bashkëpunimi në mes të Institutit të Trashëgimisë Shpirtërore dhe Kulturore të Shqiptarëve (ITSHKSH)-Shkup dhe Institutit për Hulumtime Ballkanike (IHB) në Universitetin Thrrakia të Edirnesë. Marrëveshja u nënshkrua nga drejtori i ITSHKSH, Dr.Skender Asani, dhe drejtori i IHB, Dr. Ridvan Xhanim, në prani të sekretarit shtetëror të Ministrisë së Kulturës së RM-së, Behixhudin Shehapi, dhe rektorit të Universitetit Thrakia të Edirnesë, Dr.Jener Joruk.

Të dy palët e vlerësuan si shumë të rëndësishëm këtë marrëveshje, e cila hap dimensione të reja në studimet ballkanike dhe albanologjike.

Drejtori i ITSHKSH-së, Dr.Skender Asani, tha se kjo marrëveshje do të avancohet me programe të reja të posaçme në mes instituteve tona, si dhe me hulumtime të arkivave, temave e ngjarjeve që janë me interes të ndërsjellë në mes kombit shqiptar dhe kombit turk. “Një nga projeksionet e para do të jetë hulumtimi serioz i çështjes së shpërnguljeve të shqiptarëve, si dhe historia e personaliteteve të shquara shqiptare në Turqi që nuk janë zbardhur mjaftueshëm nga historiografia”, tha Asani. 

Ndërsa, drejtori i IHB në Edrene, Dr.Ridvan Xhanim, u shpreh i entuziazmuar që bashkëpunimi në mes turqve dhe shqiptarëve dita-ditës po rritet edhe në sferën e hulumtimeve shkencore. “Unë besoj se në të ardhmen do të zhvillojnë shumë aktivitete në interes të përbashkët. Gjithashtu dua të potencoj se jemi duke përgatitur një simpozium për jetën e Sami Frashërit, që do të bëhet brenda universitetit, tha  Xhanim.

Ndërsa, rektori Jener Joruk, tha se Instituti për Hulumtime Ballkanike është i vetmi institucion i këtij profili në sistemin akademik turk, i cili ka programe post-diplomike dhe të doktoraturës. Gjithashtu ka edhe revistën për hulumtime ballkanike. “Tani Instituti në punët e veta kulturore dhe akademike fitoi një partner të ri për sferën e Albanologjisë. Për këtë shkak jemi shumë të lumtur”, u shpreh Joruk.

Universiteti Thrrakia në Edirne, është një institucionet më të fuqishme akademike në këtë rajon, dhe numëron mbi 40.000 studentë, një pjesë e të cilëve vijnë edhe nga vendet ballkanike. Para pak kohësh, në këtë universitet ka filluar të funksionojë edhe Katedra e Albanologjisë.

Një ditë më parë, drejtori Dr.Skender Asani, i shoqëruar nga bashkëpunëtori shkencor, Dr.Sevdail Demiri, mbajti një prezantim për çështjen e shpërnguljes së shqiptarëve dhe Luftën e Çanakalasë. “Në betejën vendimtare të Çanakalasë, para 101 viteve luftuan mijëra shqiptarë, të cilët mundësuan ekzistencën e Turqisë. Kurse, tani kur Turqia po rrezikohet nga faktorë të tjerë përmes sulmeve terroriste, ne u shprehim ngushëllime familjeve që pësuan, dhe përmes kulturës, si arma më e fortë, dëshirojmë të përçojmë mesazhe paqeje dhe solidarizimi me popullin turk”, u shpreh Asani.

Në kuadër të manifestimit “Ditët e Kulturës Maqedoni-Turqi” që u mbajt në Edirne prej 24-28 mars 2016, performuan dy ansamble nga Shkupi si dhe u dhanë disa filma artistik të prodhuara në Maqedoni. /www.itsh.edu.mk/