Instituti Albanologjik i Prishtinës, ia dhuroi botimet e veta ITSHKSH-së

Shkup, 30.09.2013 – Gjatë javës së kaluar, Instituti i Trashëgimisë Shpirtërore e Kulturore i Shqiptarëve – Shkup (ITSHKSH), pranoi një sasi të konsiderueshme të librave dhe literaturës tjetër shkencore nga ana e Institutit Albanologjik të Prishtinës (IAP). Bëhet fjalë për botime shkencore nga sfera e gjuhës, letërsisë, historisë, folklorit, etnologjisë, etj., të cilat janë shumë të rëndësishme për këmbimin e përvojave shkencore dhe zhvillimin e albanologjisë.

Ky donacion nga Instituti Albanologjik i Prishtinës, bëhet në kuadër të bashkëpunimit të shkëlqyeshëm ndërinstitucional me Institutin e Trashëgimisë Shpirtërore e Kulturore të Shqiptarëve – Shkup, me të cilin ka të nënshkruar edhe një memorandum bashkëpunimi. Kohë më parë, edhe ITSHKSH i ka dhuruar të gjitha botimet e veta IAP-së, dhe në bazë të marrëveshjes, do të shkëmbehen rregullisht të gjitha botimet vjetore të këtyre dy instituteve. /www.itsh.edu.mk/

——————————————————————————————————————————-