Informatë në gazetën KOHA, 27 janar 2015

Na duhen kuadro më të specializuar

Shkup, 26 janar – Në studimet pasdiplomike që priten të çelen gjatë vitit akademik 2014- 2015 Instituti i Trashëgimisë do të angazhojë edhe profesorë të huaj për të ligjëruar në leksione të veçanta. Ndërsa kuadri shkencor që në përgjithësi do të ligjërojë në ciklin e dytë të studimeve të magjistraturës përveç profesorëve, të cilët janë punonjës shkencor të Institutit, do të zgjerohet edhe me profesorë nga universitetet e tjera si Universiteti Shtetëror i Tetovës, Universiteti i Evropës Juglindore dhe institutet e tjera në vend. Konkursi për pranimin e 90 studentëve në ciklin e dytë të studimeve është shpallur këto ditë për tre programet studimore – Gjuhë shqipe, Letërsi shqipe dhe Histori me marrëdhënie ndërkombëtare. Në Institut thonë se presin që të ketë interesim për regjistrime, pavarësisht se programet e njëjta studimore organizohen si studime të magjistraturës edhe në disa universitete. “Ka nevojë për kuadro të cilët do të merren me studime të thelluara, që është edhe synimi i Institutit. Ne konsiderojmë se Instituti do të jetë një derë më shumë për të gjithë ata që duan të studiojnë, por edhe për të gjithë të punësuarit në administratën e shtetit dhe publike, të cilët kanë të përfunduara studime deridiplomike tre vjeçare përkatësisht kanë 180 kredi dhe për avancimin në vendet e tyre të punës kush kanë që të përfundojnë studimet e magjistraturës, pasi me përfundimin e tyre në Institutin tone fitojnë 120 kredi, që do të thotë se mund të emërohen dhe zgjidhen në të gjitha pozicionet e administratës”, thotë Sefer Tahiri, sekretar shkencor i ITSHKSH. Pak kohë më parë Këshilli i Akreditimit të Arsimit të Lartë akreditoi këto tre programe studimore, ndërsa Ministria e Arsimit ka lejuar fillimin e studimeve të magjistraturës. Sa u përket ambienteve, ligjëratat do të organizohen në ambientet e institutit, ku ekziston një sallë e madhe, por edhe salla më të vogla. Disa prej profesorëve që do të ligjërojnë janë punonjës të institutit, si Skender Hasani, Qemal Murati, Bukurie Mustafa, Sevdail Demiri, Naim Halimi, Zeqirija Ibrahimi dhe Sefer Tahiri e të tjerë, ndërsa stafit mësimdhënës do t’i shtohen edhe profesorë eminentë të fushës së gjuhësisë, letërsisë dhe historisë e marrëdhënieve ndërkombëtare nga SHBA-ja dhe shtetet e Evropës, thonë në institut. Regjistrimi do të zgjasë deri më 15 shkurt, ndërsa dorëzimi i dokumenteve bëhet në ambientet e Institutit. Pagesa e studimeve të magjistraturës është 2000 euro dhe në të përfshihen procedurat e regjistrimit, por edhe mbrojtja e tezës së magjistraturës, e drejtë kjo që fitohet pas semestrit të katërt. Tre semestrat janë parashikuar për zhvillimin e ligjëratave, ndërsa semestri i fundit është për përgatitjen e tezës në temë të caktuar. /Evis Halili, www.koha.mk/