Hidajete Azizi, doktoroi në shkencat filologjike  

Shkup, 24.02.2015 – Shkencave albanologjike në përgjithësi, dhe Institutit të Trashëgimisë Shpirtërore e Kulturore të Shqiptarëve në Shkup, në veçanti, iu shtua edhe një doktor shkence. Asistentja hulumtuese, Hidajete Azizi, me sukses e mbrojti tezën e doktoraturës “Sistemi antroponimik dhe patronimik i shqiptarëve të Maqedonisë”, në Fakultetin Filologjik të Universitetit të Shkupit, dhe mori gradën doktor i shkencave filologjike.

Në këtë punim shkencor, për herë të parë është vjelë, analizuar e klasifikuar lënda antroponimike e patronimike në arealin e përgjithshëm të trevave shqiptare të Maqedonisë. Një hulumtim i tillë në formën e një monografie nuk është bërë deri tani, jo vetëm për tërësinë territoriale të Maqedonisë, por as për rajone të veçanta të saj. Ky studim nxjerr në pah karakteristikat e onomastikës mbarëshqiptare, nëpërmjet të elementit vendës që ka rrënjë që nga koha ilire, nga njëra anë, dhe të veçantën e onomastikës së viseve të Maqedonisë të banuara me shqiptarë, nëpërmjet të pranisë së një numri jashtëzakonisht të madh të elementit oriental dhe elementit sllav, i cili tjetërsoi një numër të madh të patronimeve shqiptare me anë të shtimit të prapashtesave sllave, nga ana tjetër.

Komisioni recensues ishte në këtë përbërje: Dr. Asllan Hamiti (mentor), Dr. Haki Ymeri, Dr. Agim Poloska, Dr. Ajtene Qamili dhe Dr. Ismet Osmani. /www.itsh.edu.mk/