Ekspozitë dhe një sërë aktivitetesh në Uashington dhe Nju Jork

Maj 2016 – Ekspozitë në Uashington e Nju Jork, si dhe një sërë takimesh të rëndësishme me përfaqësues të administratës amerikane dhe të institucioneve kulturore e shkencore, zhvilluan këto ditë pjesëmarrësit e delegacionit nga Maqedonia, të udhëhequr nga drejtori i Institutit të Trashëgimisë Shpirtërore e Kulturore të Shqiptarëve – Shkup, Dr. Skender Asani.

Në këto takime, u theksua rëndësia e dialogut dhe mirëkuptimit mes komuniteteve me përkatësi të ndryshme fetare dhe etnike, si parakusht për zhvillimin e shoqërisë. Drejtori i ITSHKSH-së, Dr. Skender Asani, theksoi se “përmes kësaj ekspozite dhe këtyre aktiviteteve që promovojnë paqen dhe dialogun e ndërsjellë, duam të japim porosinë se vetëm të bashkuar mund ta mundim të keqen”.

Në aktivitetet që nisën me rastin e Ditës së fitores kundër fashizmit, morën pjesë edhe kryetari i Komunës Çair, Izet Mexhiti, kryetari i BFI-së h.Sulejman ef.Rexhepi, kryetarja e Komunitetit Hebraik, Berta Romano, përfaqësuesi i Ministrisë së Arsimit e Shkencës, Dr.Bardhyl Tushi, përfaqësues të Muzeut të Holokaustit të Hebrenjve, Institutit të Historisë Nacionale, TCMC-së, ZFD-së, etj.

Rrjedha e aktiviteteve nisi më 9 maj në Uashington kur u hap ekspozita me fotografi dhe dokumente nga arkivat e Maqedonisë dhe Shqipërisë që përshkruajnë përpjekjet e shqiptarëve për të shpëtuar hebrenjtë nga nazistët në periudhën e Luftës së Dytë Botërore.

Më pas delegacioni vizitoi Dhomën e Përfaqësuesve të Shteteve të Bashkuara të Amerikës dhe Kongresin Amerikan, ku zhvilloi takime edhe me përfaqësues të këtyre institucioneve amerikane.

U vizitua edhe Libraria e Kongresit Amerikan, të cilës drejtori Asani i dhuroi disa nga botimet e fundit shkencore të ITSHKSH-së. Poashtu, një vizitë u organizua edhe në Universitetin “Georgeoawn” në Uashington, një nga institucionet më të vjetra amerikane të arsimit sipëror, ku u zhvilluan biseda me profesorë të respektuar të këtij universiteti.

Ekspozita do të qëndrojë e hapur në Nju Jork deri më 20 maj 2016.  /www.itsh.edu.mk/