ITSH Instituti i Trashëgimisë Shpirtërore e Kulturore të Shqiptarëve – Shkup
Edhe sot në Institutin e Trashëgimisë Shpirtërore e Kulturore të Shqiptarëve vazhdoi manifestimi kulturor-shkencor “Ditët e Alfabetit”.
Me këtë rast u organizua një orë e historisë me një grup nxënësish nga SHF “Skënderbeu” nga f. Haraçinë të Shkupit, të organizuar nga arsimtari Xhavit Imeri.
Gjatë kësaj ore, drejtori i Institutit, Dr. Skender Asani, u uroi mirëseardhje nxënësve dhe foli për kontekstin historik në të cilin u zhvillua Kongresi i Manastirit. Ai foli për rolin e Rilindjes Kombëtare Shqiptare në gatimin e kombit shqiptar, të kulturës shqiptare dhe të pavarësisë.
Dr. Zeqirija Ibrahimi foli për dimensionin filologjik të alfabetit, duke u dhënë nxënësve informacione mbi mënyrën se si është hartuar alfabeti i shqipes.
Për ta begatuar këtë orë një nxënëse e kësaj shkolle e lexoi një kumtesë për Kongresin e Manastirit dhe alfabetin e gjuhës shqipe.
Ora e historisë përfundoi me një fotografi të përbashkët dhe me një vizitë në hapësirat e Institutit.
