Delegacioni nga Maqedonia arriti në SHBA

Sot në Uashington të SHBA-ve, arriti delegacioni nga Maqedonia, i prirë nga drejtori i Institutit të Trashëgimisë Shpirtërore e Kulturore të Shqiptarëve – Shkup, Dr. Skender Asani, në vigjilje të shënimit të 9 Majit – Ditës së ngadhënjimit kundër fashizmit. Në agjendën e përfaqësuesve të institucioneve tjera të rëndësishme të Maqedonisë, sot ishin takime me qarqe akademike, ndërsa pasojnë takime edhe me përfaqësues të administratës amerikane.

Takimi i sotëm ishte me pastorin Dr.Mark Dever, teolog dhe shkrimtar i njohur amerikan, me të cilin u bisedua rreth modeleve pozitive të bashkëpunimit ndërmjet komuniteteve të ndryshme fetare, etnike e racore në SHBA dhe Maqedoni.

Pika kryesore e kësaj vizite në Uashingron dhe Nju Jork të SHBA-ve, është hapja e ekspozitës me temë “Guximi qytetar në kohë të vështira”, e cila përmes 34 fotografive dhe dokumenteve autentike, pasqyron historitë rreth shpëtimit të hebrenjve gjatë Luftës së Dytë Botërore.

Përveç Asanit, në përbërje të këtij delegacioni janë edhe kryetari i Komunës Çair të Shkupit, z.Izet Mexhiti, kryetari i Bashkësisë Fetare Islame të Maqedonisë, h.Sulejman ef.Rexhepi, kryetarja e Komunitetit Hebraik në Maqedoni, znj.Berta Romano, si dhe përfaqësues të institucioneve tjera të vendit.

Ndryshe, ekspozita në Uashington hapet më 9.5.2016, në ora 12:00 (Adresa: 2129 Wyoming Ave NW, Washington, DC 20008, USA), ndërsa në Nju Jork hapet më 12.5.2016, në ora 19:00 (Adresa: Gallery MC, 549 West 52nd Street, 8th Floor, New York NY 10019). /www.itsh.edu.mk/