Asani vazhdoi aktivitetet kulturore në Nju Jork

Nju Jork – Drejtori i Institutit të Trashëgimisë Shpirtërore e Kulturore të Shqiptarëve në Shkup, Dr. Skender Asani, ka vazhduar aktivitetet kulturore në Nju Jork, gjatë qëndrimit disaditor në SHBA. Ai ka zhvilluar disa takime edhe me komunitetin shqiptar të këtij vendi, ku janë diskutuar kryesisht çështjet e natyrës kulturore dhe shkencore.

Kështu, në Qendrën Kulturore Shqiptaro – Amerikane në Rivendale të New Jersey-t, u promovuan librat e autorëve shqiptarë në SHBA, Dr.Valbona Karanxha, Dr.Grid Rroji dhe Dr.Shenasi Rama, dhe u zhvillua një debat domethënës. Me këtë rast, drejtori ITSHKSH-së, Dr.Skender Asani, me një këndvështrim të një historiani dhe intelektuali i cili jeton dhe punon në atdhe, ndihmoi konsiderueshëm debatin duke diskutuar për rrënjet e së keqes shoqërore shqiptare, dhe rrugëve të mundshme për tejkalimin e problemeve tona.

Bashkëatdhetari nga Maqedonia, Esat Ahmeti, i cili jeton dhe vepron në SHBA, në rolin e promotorit, theksoi rëndësinë e mbajtjes gjallë të mërgatës shqiptare përmes zhvillimit të kulturës dhe shkencës, si e vetmja rrugë e cila premton ardhmëri të sigurtë për popullin tonë.

Ditë më parë, drejtori Asani, bashkë me kryetarin e Bashkësisë Fetare Islame të Maqedonisë, h.Sulejman ef.Rexhepi, bëri vizitë në Qendrën Islame Shqiptare në New York, ku u pritën nga imami i kësaj qendre, Omer ef. Kadriu.

Delegacioni nga Maqedonia po qëndron në SHBA me rastin e hapjes së ekspozitës “Guximi qytetar në kohë të vështira”, e cila përmes 34 fotografive dhe dokumenteve autentike, pasqyron historitë rreth shpëtimit të hebrenjve gjatë Luftës së Dytë Botërore. Kjo ekspozitë u hap në Nju Jork dhe Uashington, dhe nxiti vëmendjen e publikut amerikan, me besën e fortë shqiptare, si një institucion i veçantë i cili nuk haset në asnjë popull tjetër në këto përmasa. /www.itsh.edu.mk/