Qasje në dokumentet e ish-Sigurimit të Shtetit Shqiptar

Tiranë, 17.5.2019 – Sot në Tiranë u nënshkrua marrëveshje bashkëpunimi ndërmjet Institutit të Trashëgimisë Shpirtërore e Kulturore të Shqiptarëve në Shkup dhe Autoritetit për Informim mbi Dokumentet e ish-Sigurimit të Shtetit nga Tirana.

Kjo marrëveshje parasheh që studiuesit e Institutit të mund të realizojnë hulumtime shkencore për dosjet e ish sigurimit të shtetit shqiptar, veçanërisht për çështje që kanë të bëjnë me shqiptarët e Maqedonisë gjatë periudhës së monizmit.

Nënshkrimi u bë nga drejtori i Institutit të Trashëgimisë Shpirtërore e Kulturore të Shqiptarëve nga Shkupi, Dr. Skender Asani, dhe kryetarja e Autoritetit për Informim mbi Dokumentet e ish-Sigurimit të Shtetit, znj. Gentiana Sula.

Me këtë rast Drejtori Asani deklaroi: “Kjo marrëveshje bashkëpunimi për neve paraqet një faqe krejt të re dhe një mundësi krejt të re, të paprovuar nga askush më parë, që në mënyrë institucionale – përmes studimit në dokumentacionin në ish-Sigurimin e Shtetit, ta njohim saktë dhe drejt të kaluarën tonë. Sepse, edhe si historianë që jemi, ne e dimë mirë se pa njohjen e së kaluarës, nuk mund ta projektojmë as të ardhmen.”

Marrëveshja e bashkëpunimit u nënshkrua në kuadër të konferencës shkencore “Fytyra e ‘armikut të popullit’ gjatë diktaturës së proletariatit në Shqipëri 1944-1990”, që po mbahet sot në Tiranë dhe ku, mes shumë studiuesve e historianëve, po merr pjesë edhe Dr. Skender Asani.

Facebook Koment

Shikoni gjithashtu

KUAZAT HUMANE TË NËNË TEREZËS, UDHËRRËFYES PËR TË SOTMEN DHE TË ARDHMEN TONË

KUAZAT HUMANE TË NËNË TEREZËS, UDHËRRËFYES PËR TË SOTMEN DHE TË ARDHMEN TONË Sot në …