Punët e mira vijnë ngadalë, por janë më të sigurta!

Një përgjigje ndaj të gjithë atyre që po kërkojnë me shpejtësi të rikthehet gjendja siç ka qenë më parë në kompleksin që shënon gjurmët e dikurshme të shtëpisë së lindjes së Nënë Terezës.

Nga:
Dr. Skender Asani,
drejtor i ITSHKSH-Shkup

Shkup, 20.05.2020 – Pas një beteje të gjatë publike-mediatike, Qyteti i Shkupit dhe ITSHKSH gjetën një pakt mirëkuptimi që situata problematike rreth zhvendosjes së gjurmëve që lidhen me trashëgiminë e Nënës Terezë, të rikthehen në gjendjen e mëparshme.

Na vjen mirë që autoritetet e Shkupit reflektuan pozitivisht dhe zgjodhën rrugën e shtegdaljes, duke i lënë hapësirë dialogut dhe zgjidhjes me konstruktivitet të problemeve të paraqitura. Fillimisht u premtua se do të hapet një qasje që do të shërbejë si shteg për pelegrinazh në pllakën përkujtimore që shënon vendndodhjen e shtëpisë së lindjes së Nënë Terezës dhe kjo u bë me vendosjen e zhavorit, pastaj edhe të disa pllakave, por krejt këto në funksion të gjetjes së zgjidhjes sa më adekuate.

Ne shpresojmë se ky projekt do të përfundojë brenda pak ditësh dhe kryetari i Shkupit, z. Shilegov, do ta mbajë fjalën, duke rivendosur shenjat e themeleve të shtëpisë së lindjes së Nënës Tereze dhe hapjen e një shtegu për pelegrinazh. Me këtë do të shuhet edhe kureshtja e gjithë atyre që këtyre dy ditëve ishin shumë të zellshëm me komente nga më të ndryshmet nëpër rrjetet sociale.

Krejt këtë sqarim po e bëj në funksion të përgjigjes ndaj të gjithë skeptikëve qëllimmirë të cilët kërkojnë që brenda natës të kryhen këto punë, por, siç thotë populli, punët e mira vijnë ngadalë. Prandaj nuk kemi arsye të mos besojmë se Qytetit i Shkupit, ndonëse ka pranuar se ka qenë i ekspozuar ndaj presionit publik, kësaj radhe do të jetë anën e duhur të krejt kësaj historie, duke u bërë edhe vet pjesë e ruajtjes dhe kujdesit ndaj trashëgimisë shpirtërore e materiale të Gonxhe Bojaxhiut – Nënës Terezë.

Ne në asnjë moment nuk kemi dashur që ta radikalizojmë situatën, qoftë me veprime konkrete, qoftë me gjuhën e shprehur publike, për arsye se konsiderojmë se Nënë Tereza nuk e meriton që të bëhet mollë sherri në mes të komuniteteve të ndryshme që jetojnë në këto hapësira dhe më së paku të jemi ne si institucion shkaktar i polarizimeve të panevojshme. Përkundrazi, pikërisht fryma e saj e tolerancës dhe mirëkuptimit na ka shërbyer edhe neve, qoftë duke hapur fillimisht një Departament për mbrojtjen dhe studimin e figurës dhe veprës së Nënës Terezë, qoftë duke dëshmuar me sjelljen tonë kulturën e mirëkuptimit qytetar, në mënyrë që  edhe qytetit të Shkupit t’i lihet hapësirë për reflektim pozitiv.

Me këtë rast dua të them se në këtë betejë humane e civile nuk ishim vetëm, ndaj falënderoj publikisht edhe të gjitha ata që na mbështetën, sidomos Universitetin “Nënë Tereza”, IN Shtëpia Përkujtimore “Nënë Tereza”, shoqatat joqeveritare në Shkup e Strugë që mbajnë emrin e nobelstes sonë, mediat dhe gazetarët si dhe të gjithë individët vullnetmirë.

Facebook Koment

Shikoni gjithashtu

Ndahet nga jeta Sylë Zhitia – një motor stimuli për të gjithë

Me pikëllim të tellë morëm lajmin për vdekjen e veprimtarit të palodhur të çështjes kombëtare, …