Debat mbi rolin e Islamit në mbrojtjen e identitetit kombëtar

Staten Island – Gjatë “Javës kulturore shqiptare në SHBA”, mbrëmë (13 shtator) Instituti i Trashëgimisë
Shpirtërore e Kulturore të Shqiptarëve, në bashkëpunim me Qendrën Kulturore Islame-Shqiptare në Staten Island, pikërisht në selinë e kësaj qendre në Nju-Jork, e organizoi debatin “Roli i Islamit në mbrojtjen e identitetit kombëtar”, duke e promovuar edhe edicionin SCUPI
27, që është një përmbledhje e kumtesave të konferencës me këtë titull, e cila është mbajtur në qershor të këtij viti në Shkup nën organizimin të Institutit të Trashëgimisë Shpirtërore e
Kulturore të Shqiptarëve dhe Fakultetin të Shkencave Islame në Shkup.
Panelin e hapi Dr. Tahir Kukaj nga Qendra Kulturore Islame-Shqiptare në Staten Island, njëherazi edhe përfaqësues i myslimanëve në Shtetin e Nju-Jorkut. Ai, në cilësinë e nikoqirit, u dëshiroi mirëseardhje mysafirëve nga Shkupi dhe, shkurtimisht, foli për rëndësinë e madhe që ka pasur Islami për ndërtimin e identitetit kombëtar shqiptar, duke e theksuar rolin e mirë që ka luajtur edhe për mërgatën shqiptare në Amerikë, duke ndihmuar në kohezionin kombëtar, ruajtjen e vlerave tradicionale shqiptare dhe kultivimin e tyre.
Pastaj në panel u paraqit drejtori i Institutit të Trashëgimisë Shpirtërore e Kulturore të Shqiptarëve, Dr. Skender Asani, i cili theksoi se “Islami për shqiptarët në Maqedoni ka luajtur rol të rëndësishëm në mbrojtjen dhe kultivimin e identitetit kombëtar.”. Ai në veçanti u ndal në rolin e krerëve fetarë myslimanë në mbrojtjen e popullatës shqiptare gjatë ofensivës së shpërnguljeve të dhunshme, kolonizimit dhe reformës agrare. Si shembull të këtij
përkushtimi ai e veçoi punën e organizatës politike “Xhemijeti”, që gjatë viteve 1919-1925, duke e gjetur mundësinë e vetme të organizimit politik nën ombrellën e identitetit fetar, në të
vërtetë e bëri betejën më të madhe për ta mbrojtur popullatën shqiptare nga presioni i Mbretërisë SKS.
Në fund foli edhe Dr. Zeqirija Ibrahimi – Sekretar Shkencor në Institutin e Trashëgimisë Shpirtërore e Kulturore të Shqiptarëve, i cili e vuri në pah se Islami në mesjetë ka qenë faktor për homogjenizimin e arbërve, mbi çka është gatuar identiteti kombëtar shqiptar në shek. XIX. Ndërkaq, kur foli në kontekst të Maqedonisë, ai tha se: “Shqiptari i Maqedonisë mbeti shqiptar pikërisht sepse ishte mysliman. Nëse e shohim fatin e shqiptarëve ortodoksë, e kuptojmë se përse për shqiptarët Islami ishte mburoja që e pengoi asimilimin dhe brejtjen e identitetit kombëtar shqiptar në Maqedoni”.
Ndërkaq në shenjë falënderimi për bashkëpunimin korrekt dhe mbështetjen e ofruar, drejtori Asani ia ndau nikoqirit, Dr. Tahir Kukaj, mirënjohjen “Mik i Institutit”.
Facebook Koment

Shikoni gjithashtu

KUAZAT HUMANE TË NËNË TEREZËS, UDHËRRËFYES PËR TË SOTMEN DHE TË ARDHMEN TONË

KUAZAT HUMANE TË NËNË TEREZËS, UDHËRRËFYES PËR TË SOTMEN DHE TË ARDHMEN TONË Sot në …