Instituti pajiset edhe me një auto-veturë

Shkup, 06.03.2015 - Në vigjilje të 7 Marsit, Ditës së Arsimit Shqip, sot Institutin e Trashëgimisë Shpirtërore e Kulturore të Shqiptarëve në Shkup, e vizioi drejtori i Agjencisë për menaxhim me mallrat e konfiskuara, z. Bashkim Ameti, i cili Institutit i ndau vendimin për dhënien e një veture tereni, e cila do të shërbejë për nevojat e punëtorëve shkencor gjatë ekspeditave hulumtuese shkencore. Drejtori i ITSHKSH-së, Dr.Skender Asani, falënderoi për këtë kontribut, duke thënë se kjo është edhe një investim më tepër në krijimin e kushteve të nevojshme për zhvillimin e shkencës dhe kulturës shqiptare në Maqedoni. Kurse, drejtori i agjencionit në fjalë, z.Bashkim Ameti, theksoi se ky aktivitet është në vazhdën e ofrimit të ndihmës së tillë në pajisje me auto-vetura dhe nevoja tjera për disa institucione të rëndësishme shqiptare në Maqedoni, në mesin e të cilëve është edhe Instituti. /www.itsh.edu.mk/

Vizitë e ambasadorit bullgar, z.Ivan Petkov, në ITSHKSH

Shkup, 05.03.2015 – Sot Institutin e Trashëgimisë Shpirtërore e Kulturore të Shqiptarëve - Shkup, e vizitoi Ambasadori i Republikës së Bullgarisë në Shkup, z. Ivan Petkov, i shoqëruar nga Sekretari i parë i ambasadës, z. Angel Banxhov. Drejtori i ITSHKSH-së, Dr.Skender Asani, theksoi se ka një vazhdimësi të bashkëpunimit mes shqiptarëve dhe bullgarëve që nga periudha e Rilindjes Kombëtare Shqiptare, kur një numër i madh i rilindësve tanë e zhvilluan veprimtarinë e tyre në Sofje, përmes klubeve, librave e gazetave. Ndërsa, tani interesi i përbashkët është që të zhvillohen këto lidhje në sferën e shkencës, arsimit e kulturës. Ambasadori bullgar, duke uruar për punën e deritashme të Institutit, thekosi se Ambasada e Bullgarisë, do të angazhohet që të jetë një urë lidhjeje mes ITSHKSH-së, institucioneve shkencore dhe arkivave bullgare, kur ka material të bollshëm edhe për historinë, kulturën dhe të kaluarën e shqiptarëve dhe bullgarëve. Ai me këtë rast, për bibliotekën e ITSHKSH-së dhuroi disa libra të rëndësishëm dhe të vjetër nga sfera e historisë. Gjatë takimit u konkludua, që në të ardhmen të ketë pjesëmarrje të përbashkëta të kuadrit arsimor e shkencor në disa organizime kulturore dhe shkencore në Shkup dhe Sofje. /www.itsh.edu.mk/

Ndahen indekset e parë për magjistrantët në ITSHKSH

Shkup, 02.03.2015 - Sot ishte ditë e veçantë për Institutin e Trashëgimisë Shpirtërore e Kulturore të Shqiptarëve në Shkup, dhe për zhvillimin e shkencës shqiptare në Maqedoni. Praktikisht filloi funksionimi i studimeve pasdiplomike të magjistraturës, në programin studimor “Histori dhe marrëdhënie ndërkombëtare”. Drejtori i ITSHKSH-së, Dr. Skender Asani, indeksin e parë ia dorëzoi znj. Silke Maier Wit, një aktiviste e palodhshme e shoqërisë civile nga Gjermania, dhe njohëse e mirë e rrethanave të këtushme ballkanike, e cila tani ka vendosur që të hyjë edhe në vorbullën e shkencës. Gjeneratës së parë të studentëve të magjistraturës, u dëshirojmë suksese në punën e tyre studimore e hulumtuese. Kurse, gjenerata e ardhshme e studentëve, do të jetë ajo e afatit të shtatorit. /www.itsh.edu.mk/         

Do të shënohet 70 vjetori i numrit të parë të gazetës “Flaka”

Shkup, 01.03.2015 - Instituti i Trashëgimisë Shpirtërore e Kulturore të Shqiptarëve në Shkup, në bashkëpunim me Shoqatën e Historianëve Shqiptarë në Maqedoni, dhe Shoqatën e Gazetarëve të Maqedonisë, sivjet do ta shënojë 70 vjetorin e botimit të numrit të parë të gazetës “Flaka e Vëllazërimit”. Kjo u vendos në mbledhjen e djeshme në mes udhëheqësve të këtyre subjekteve, Dr. Skender Asani (drejtor i ITSHKSH) e Naser Selmani (kryetar i SHGM), ku për koordinatorë të aktiviteteve u caktuan Dr. Sevdail Demiri, hulumtues i historisë së shtypit shqiptar në Maqedoni, dhe Dr. Sefer Tahiri, analist dhe komunikolog. Në takim u vendos që ky përvjetor i rëndësishëm për historinë e gazetarisë shqiptare, të shënohet më 4 prill 2015 në ITSHKSH – Shkup, me një tryezë shkencore, me pjesëmarrjen e historianëve, gjuhëtarëve, gazetarëve e intelektualëve, që kanë qenë pjesë e drejtpërdrejtë e sukseseve dhe sfidave të kësaj gazete nëpër dekada, si dhe me një ekspozitë me fotografi dhe dokumente që kanë të bëjnë me fillet e punës dhe zhvillimin e gazetës “Flaka”. Me këtë rast, Këshilli organizativ vendosi që të bëjë ftesë publike për të gjithë të interesuarit për të marrë pjesë aktive në këto aktivitete. Disa nga tezat e debatit do të jenë: rrethanat historike – politike në prag të botimit të gazetës “Flaka”, kushtet e punës dhe themeluesit e gazetës “Flaka”, rëndësia e “Flakës” në historinë e gazetarisë shqiptare, roli i saj në zhvillimin e kulturës dhe arsimit shqip, kontributi i gazetës “Flaka” për ruajtjen dhe kultivimin e gjuhës standarde shqipe, emra dhe pena të shquara – gazetarë dhe bashkëpunëtorë të “Flakës”, censura dhe presionet, polemika, rëndësia e revistave “Fatosi”, “Gëzimi” e  “Jehona”, shuarja e gazetës “Flaka” - një trashëgimi e paçmuar, mundësia e digjitalizimit të arkivit të gazetës “Flaka”, mundësia e ringjalljes së gazetës “Flaka”, etj. Për çfarëdo lloj informate apo konsulte, luten të interesuarit që paraprakisht të paraqiten te organizatorët, përmes adresës elektronike: kontakt@itsh.edu.mk ose numrit të telefonit +389 70 559 116. Ndryshe, 70 vjetori i themelimit të gazetës “Flaka” në Shkup, është edhe pjesë e programit vjetor të Kuvendit të Republikës së Maqedonisë, për shënimin e përvjetorëve të rëndësishëm jubilarë për vitin 2015. /www.itsh.edu.mk/